– Eg vel å tru at folk i Kvinnherad ynskjer andre godt

– Me ligg ganske bra an, men eg er litt spent, både på oppmøte og om det kjem reaksjonar. Eg har merka at det er litt temperatur kring pride i det siste, spesielt etter at ordføraren valte å heisa flagget. Eg vel likevel å tru at folk i Kvinnherad ynskjer andre godt, og at me får eit veldig bra arrangement, fortel dagleg leiar for Romsleg Jorun Larsen.

– På kva måte har du merka den auka temperaturen?

– Det har vore mest på sosiale media, der det blant anna oppstod ein heftig debatt i kommentarfeltet på facebook-sida til Kvinnheringen. Der var det mange ufine kommentarar som eg ikkje tykte var ok. Men eg tenkjer også at det er lett å vera ueinig i eit kommentarfelt, og at terskelen er mykje høgare for å syna motstand mot pride på andre måtar, svarar Larsen.

Engasjement

Larsen er enormt takksam for all støtta og hjelpa dei har fått i samband med Pride-arrangementet som skal finna stad komande laurdag i Uskedalen.

– Me spurte etter frivillige og folk berre kasta seg på. Det har ikkje vore noko problem med å skaffa folk, og ingen har sagt nei dersom me har bedt om hjelp til noko. Me er frykteleg takksame for kor positive dei aller fleste er til at me arrangerer Pride, seier Romsleg-leiaren.

At pride er noko som engasjerer er det liten tvil om, og akkurat det er Larsen glad for.

– Det er eit stort engasjement for å synleggjera og støtta opp om skeive sine rettar. At det er så mange som talar for Pride, er godt å sjå. Det er heilt supert, og hjarta mitt smeltar av det. Utan engasjement blir det usynleg, noko som kanskje er det langsiktige målet; At det ikkje skal vera behov for å markera Pride, fordi det ikkje er noko skilnad på å leva eit heterofilt liv og eit homofilt liv, seier Larsen.

– Samtidig er det viktig at motstemmene til Pride også kjem fram. Dersom det ikkje er dialog, skjer det heller ingen utvikling. Ein må snakka om ting for å få framgang. Engasjement er rett og slett vesentleg for å koma nokon veg, understrekar ho.

Program

Larsen kan fortelje at det heile startar med velkomst i båthamna, der det meste av programmet også skal føregå. Det kjem også til å bli nokre appellar av Aleksander Papas og Synnøve Handeland.

– Eg veit kva dei har tenkt til å snakka om, og eg trur at det blir både veldig fint og viktig å få med seg kva dei har å sei. Etter det blir det litt kåringar, blant anna til beste antrekk, i tillegg blir det trekt ut ein pengepremie til eit av dei lokale laga som har meldt seg på til paraden, fortel Larsen.

– Me har invitert lokale lag til å vera synlege i paraden, slik at både barn, unge og vaksne kan føla seg heime i miljøet dei er i. Så for å gje litt tilbake til dei, så har me valt å ha ei slik trekking, og det er framleis mogeleg å delta for dei som ynskjer, seier ho.

Vidare fortel ho at det også sjølvsagt blir parade som skal gå ein liten runde rundt bygda. Før det heile vert avslutta nede i båthamna med både minikonsert med Lekende Lett, som også skal spela seinare på kvelden under Festidalen, i tillegg til kakefest heilt til slutt.

– Me gler oss veldig masse til å markera dagen, vera i lag og ha ei felles feiring av at alle skal få vera den dei er og elska den dei elskar, avsluttar Romsleg-leiaren.