– Eg trur saka er ferdig no
Leif Sverre Enes, som følgde møtet i forvaltningsutvalet frå sidelina, var sjølvsagt nøgd med politikarane sitt vedtak.
Publisert
Sist oppdatert
– No er dette historie, og eg har byrja å planleggja neste sesong. Eg trur saka er ferdig no, kommenterte han til Grenda.
Enes opplyste vidare at han følgde pålegget om å stansa bubilparkeringa, noko han skal ha gjort den 4. juli, altså dagen etter å ha motteke brevet frå kommunen.
Annonse
– Eg fekk 22 timar på meg til å ta ned skilta (om parkering), elles ville eg få dagmulkt, og det hadde eg ikkje råd til, sa han.
Enes er ikkje sikker på om det vert bubilparkering på desse to tomtene i 2024, for han leikar med andre planar også.
– Eg har ikkje konkrete planar enno. Det kan bli kva som helst. Men det er eit vanvitig flott område, som kan utviklast innan reiseliv. Ein kan utan store inngrep i naturen til dømes laga ein grøn campingplass. Eller kanskje eg berre skal bli pensjonist. Eg har vore inne på tanken sidan eg fyller 70 år til neste år. Men akkurat her tvilar eg på meg sjølv, og kona trur ikkje på meg, humra Leif Sverre Enes.
Vanskeleg
Annonse
Forvaltningsutvalet oppheva som nemnt administrasjonen sitt vedtak frå i sommar. Rett etter møtet onsdag spurde Grenda avdelingsleiar Natalie Martins Sæberg om det vil skje noko meir i saka frå kommunen si side, eventuelt kva.
– Det er det litt vanskeleg å svara på. Vi må fyrst sjå på detaljane og føringane som ligg i vedtaket, svarte ho.
