– Eg trur fleire vil søkje seg til slike reiser

Gruppa på ni reisande frå fleire ulike land kringom verda, har teke turen til Norge for å bruka ei veke på å segla deler av kystpilegrimsleia. Dei seglar frå nøkkelstad til nøkkelstad og samlar informasjon og stempel langs ferda.

Reiselivskonsept

Halsnøy Kloster er ein av fleire slike nøkkelstader langs kystpilegrimsleia, og då dei reisande segla inn på den staselege skuta Caroline af Sandnes vart dei møtt av avdelingsleiar for klosteret Helèn Petersen, som tok i mot dei og gav dei ei spanande innføring i både historia til klosteret og historier om dei som ei gong har budd der.

– Me starta i Stavanger tidlegare i veka, så har me segla oppover. Gamle sjøvegen er ein viktig del av pilegrimsleia, og tanken no då er å kunne utvida dette som reiselivskonsept, fortel Steinar Larsen direktør for Trondheim Internasjonale Olavsfest.

Det var fleire reiselivsoperatørar med som ynskjer å finna meir ut om korleis dei kan organisere både lange og korte turar langs kystpilegrimsleia, noko avdelingsleiar Petersen er glad for.

– Dette er på sett og vis ein pressetur, så då må me jo syna fram det beste me har. Eg håpar at når desse respektive som no kjem på besøk frå ulike land så spreiar dei ordet vidare etterpå, slik at me gjerne då får fleire turistar ut hit i distriktet, seier Petersen.

– Me er framleis i ein innkøyringsfase i høve å gjera kystpilegrimsleia kjent, og me treng mykje betre skilting slik at folk finn vegen. Der er kommunen allereie på veg inn på banen. Litt av hensikta med desse turane er jo nettopp det at sjølve pilegrimsreisreisa skal verta meir kjent, for me har jo eit veldig viktig kulturminne her og har litt å by på, fortset ho.

Rom for ro

Ein av dei reisande er Gea van Veen frå Nederland som er med på denne turen for å skriva ein sykkelguide for heile pilegrimsleia etterpå.

– Eg har tidlegare laga fleire sykkelguidar for andre pilegrimsleier, rettnok har dei vore på land. Denne gongen er det jo for denne kystpilegrimsleia. Eg er med no for å sjå litt på korleis det lar seg gjere, fortel den sykkelinteresserte nederlenderen.

– Eg kjem tilbake neste år for å sykla heile sjølv, og gjere grundigare undersøkingar då. Det gjer eg alltid når eg skal skrive ein sykkelguide. I tillegg syklar eg diverse mogelege avstikkarar ein kan ta for å nå ulike mål og stader, legg ho til.

Ein annan reiselivsoperatør og nederlender med på reisa er Anne van Oorschot som meiner at pilegrimsreiser er noko som berre kjem til å auka i popularitet.

– Slik som liva til mange er i dag, med travle dagar med tidspress og stress i eit evig hamsterhjul, så trur eg at fleire og fleire ynskjer å søkja seg til slike reiser som dette. Reiser som gjev rom for å roa ned og tid og rom for ettertanke og meditasjon, og ikkje minst vakker natur og gode menneskemøte, seier van Oorschot.

Medan den reiseglade gjengen fylgde Petersen rundt på tunet var alle øyrer spissa for å få med seg det som vart sagt. Det var liten tvil om at dette var eit felt som interesserte og avdelingsleiaren hadde mange interessante fakta om både Klosteret sjølv og ikkje minst folka som høyrde til her.

Då den guida turen var over vart alle geleida inn for ein liten, men hyggeleg og søt matbit før det berre var den viktigaste biten som gjenstod, å få stempel i pilegrimspasset sitt. Så tok alle beina fatt og gjekk tilbake til skuta for å segla vidare på ferda, med neste stopp Bergen.