– Eg kan garantere kaos

Norsk bubilforening Region Vest har lagt årsmøtet sitt til Halsnøy siste helga i april. Der er det plass til 20 bubilar. Det er venta 60.

Kurt Henriksen har ikkje noko med sjølve treffet å gjera, men som leiar i Halsnøy kulturhus vil han bidra til å informere innbyggjarar og tilreisande om at det kan bli smått trangt om parkering i Sæbøvik mellom 29. april og 1. mai.

Då er det nemleg klart for årsmøte og årsmøtetreff for Region Vest i Norsk Bubilforening.

– Det er mykje som skjer den helga, så eg kan garantere kaos. Strupebandet skal ha konsert, og vi held på med store oppgraderingar på huset her. Timinga er vel ikkje heilt ideell sånn sett, men det er difor viktig å få ut informasjon: Folk vil få problem med å parkera, slår Henriksen fast, før han tørt legg til:

– Det blir jo artig.

Trongt om parkeringsplassen

På Norsk bubilforening sine sider står det svart på lysegrått at det er plass til «ca. 60 bubilar» på bubilparkeringa ved Halsnøy kulturhus. I følgje Henriksen har dei aldri hatt så mange bilar parkert der, så dei som kjem må førebu seg på å stå rundt om i sentrum, der det er plass.

Dette vil såleis få følgjer for gjestene som skal på Strupeband-konsert, eller andre som finn vegen til og forbi Sæbøvik denne helga.

– Kanskje oppmoda til mest mogleg bruk av sykkel den helga, foreslår bladfyken, og får ei stadfestande humring til svar.