– Eg har ikkje ord på kor stort dette er

Deilig følelse! seier Johnny Furdal til Grenda i det han går av Ullevaal-matta.

Han var ein av dei aller siste Viking-spelarane som forlét graset etter at kongepokalen er sikra, overlevert og grundig feira saman med supporterane.

– Det går sikkert opp for meg i morgon kor stort dette er. For dette er svært! Dette er den største kampen i livet mitt, det blir ikkje større enn dette. Eg er glad og rørt, sa han.

Feira med familien

Då fløytesignalet gjekk stupte han saman med ekstatiske lagkameratar ut på graset og bort til supporterane og jubla lenge saman med dei. Etterpå tok han turen bort til den delen av tribunen der far, søsken, anna slekt og vener sat. Der tok han seg god tid med dei, og fekk både klemmar og tårer i retur.

– Eg har ikkje ord på kor stort dette er. Eg kan ikkje beskriva følelsen. 30.000 på tribunen. Slekt og vener på plass for å følga med. Og me vinn fullt fortent. Er klart best i første omgang, men blei kanskje litt feige etter pause. Men kva pokker, me vann! Haugesund skapte éin sjanse, kanskje to, oppsummerte han samstundes som gratulasjonane hagla frå supporterar og støtteapparat.

Litt nervøs

At Norges Fotballforbund set opp årets største klubbkamp på ei tid av året der Sølvguttene har reinska røysta for å syngja jula inn, er i beste fall merkeleg. Då Viking og FK Haugesund kom til Ullevaal stadion låg fleire centimeter med våt snø på banen, slik det også gjorde i resten av Oslo. Og om det ikkje var brøytebilar á la Haukelifjellet som måtte i sving, så var det for mykje å rydda med handmakt. Men då raud Swix kunne bytast med knottesko, var Furdal parat. Han spelte dei 67 første minutta av kampen.

– Eg var god defensivt, litt slurvete offensivt, var eigenvurderinga i etterkant.

Han var med på å trekka opp eit knippe angrep før pause, då Viking dominerte banespelet. Etter at kaptein Zlatko Tripic scora det som skulle bli kampens einaste mål på straffe, vart dei mørkeblå meir forsiktige og Furdal gjekk av banen midtvegs i omgangen.

– Korleis var oppladinga?

– Fredag fekk eg vita at eg skulle starta. Du blir jo litt nervøs, og i natt sov eg veldig dårleg. Litt spent, veit du. No er det bankett her på Ullevaal og så fly heim til Stavanger, der det er ny bankett og festing, sa Furdal før han gjekk i garderoben.

Kjenslelada

Grenda snakka med Johnny Furdal på måndag også.

– Det blei litt kjenslelada etter kampen. Eg merkar jo at dette er stort, både for meg og mange andre. Då me kom til torget i Stavanger rundt midnatt var det tjukt med folk som tok oss i mot. Det er ein fotballgal by og Viking er ein stor klubb i norsk samanheng. Dette betyr mykje for Stavanger og regionen, sa han då.

Utover søndagen og inn i måndagen har telefonen fylt seg opp med meldingar frå aust og vest, sør og nord.

– Eg har fått så mange gode meldingar at telefonen nesten er full. Det er kjekt. Og det er kjekt å setja Kvinnherad litt på kartet igjen. Eg er utruleg glad og stolt. Det er ikkje alle som får oppleva dette, og det er ein god prestasjon å vinna cupen, meinte han.