– Eg har eit stort engasjement for norsk landbruk og matproduksjon

Kjetil Mehl er oppvasken på gard og har sjølv drive som både mjølke- og sauebonde. No står gardsdrifta på kona, Lene Vangberg Monsen, også kjend som Brødskreppa i Omvikdalen, medan Mehl jobbar som tømrar hjå Kjell Høyland. Før han kan ta til i den nye jobben, som etterfølgjaren til Tore Eik, skal han berre byggja ferdig eit hus.

– Dette var ein moglegheit som eg ikkje kunne la vera å søka på. Men eg hatar å seia opp, så akkurat den biten er ikkje så kjekk. Det er dessutan eit skrikande behov for tømrarar, medgir Mehl då han har ein dag på det nye kontoret.

1. september blir han offisielt og for fullt rådgjevar på landbrukskontoret, men i ein overlappingsfase vil han nytta fleire dagar på rådhuset for å få kjennskap til oppgåvene som ventar.

Lista ligg ganske høgt

No håpar han å kunne vera med å vidareutvikla landbrukskontoret i tida framover.

– Det er mange kommunar som misunner oss, det er noko vi får høyra frå folk i heile Vestland. Så lista ligg jo ganske høgt, men eg vil gjera ein god innsats for å halde det slik. Det er mange ulike oppgåver knytt til jobben, men mitt største engasjement ligg nok i det aktive landbruket i kommunen, samt i å sikre norsk matproduksjon, forklarar han.

Mehl er utdanna agronom og har studiekompetanse. Apropos diskusjonane som har vore oppe i samband med andre tilsettingar i kommunen den siste tida, rundt fagkompetanse versus arbeidskompetanse, stiller den nye landbruksrådgjevaren sterkt på sistnemnde.

– Eg har brei erfaring frå ulike verv, til dømes som leiar i Hordaland Bondelag, og har kjennskap til næringa gjennom eige arbeid som praktiserande bonde, så når det kjem til erfaring scorar eg høgt. Eg har dessutan god kjennskap til landbruket i Kvinnherad. På utdanning scora eg nok dårlegast, men landbruket er ei praktisk næring der ein uansett ikkje kan lesa seg til alt, slår han fast.

I tillegg til relevant erfaring har han også eit stort og nettverk som kan koma godt med i den nye jobben.

– Tore Eik sa faktisk nettopp at denne jobben er ganske personavhengig, og då speler slike faktorar inn, legg Mehl til.

Ønskjer god aktivitet og sikre inntekter

Landbruket er ei næring i rask utvikling, og det ventar fleire store utfordringar i tida som kjem. Mellom anna er det nye krav knytt til mjølk, storfehald og beite i 2024, som Mehl veit at enkelte vil slita med å imøtekoma. Det førebels største kravet ventar i 2034, der det blir krav om lausdrift.

– Jordbruksoppgjeret viste at det finst vilje til endring, og næringa er generelt sett nøgd. Men det er framleis mange «men», understrekar han, og rundar av:

– Eg skal iallfall freista å bidra til at vi har flest mogleg mjølkebønder i Kvinnherad i tida som kjem. Det er jo slik at jo meir aktivitet vi har her, jo meir tilskot kan vi få hit til kommunen. Det viktige framover blir såleis å skapa aktivitet og sikra inntekt til bøndene i Kvinnherad.

Desse ønskjer å erstatta Tore Eik og Karin Thauland