– Eg fekk i oppgåve å bera nokre bagar i ein bil, men blei fortalt at eg ikkje hadde ansvar

– Oppdragsgjevaren min i Albania spurte om eg ville ha hjelp, eller om eg ville skaffa meg eit problem. Det opplevde eg som ein trussel, og det var denne setninga som fekk meg til å gjera det eg fekk beskjed om. Eg frykta også for at familien min i Albania skulle bli drepne om eg ikkje følgde ordre. Eg var stressa.

Det fortel ein 27år gammal narkotiltalt, albansk mann i Hordaland tingrett tysdag.

Saman med fire andre albanarar er han tiltalt for innføring av 150 kilo kokain til Husnes. Stoffet var festa under skipet «Nordloire», og blei henta opp av dykkar, meiner politiet.

Alle fem er tiltalte etter den såkalla mafiaparagrafen.

Denne opnar for å gje organiserte grupper av kriminelle strengare straff, gjennom eit straffetillegg på inntil seks års fengsel til den eigentlege dommen.

– I god tru

27-åringen er tiltalt for mellom anna planlegging av oppdraget, og mottak og frakt av både utstyr og kokain. Han nektar straffeskuld.

Då han blei spurt om skuldspørsmålet, erkjente han at han tok imot dykkarutstyr på Gardermoen, og frakta dette til Husnes. Han hevdar han gjorde dette i god tru, og at han trudde at oppdraget hans på Vestlandet var å renovera eit hus.

– Eg har aldri hatt problem med politiet før, fortel han i retten.

Mannen hevdar at han ikkje kjente til at det var narkotika han tok imot i vasskanten på Husnes i april i fjor, og at han blei ført bak lyset.

27-åringen erkjenner å ha teke imot dykkarutstyr på Gardermoen, og frakta dette til Husnes, men hevdar han gjorde dette i god tru.

Fattig barndom

Mannen opnar forklaringa si med å forklara om ein fattig og sjukeleg barndom heime i Albania. Berre 13 år gammal skal han ha byrja å jobba som servitør for luseløn, med håp om å brødfø familien sin.

Etter kvart kom han seg inn i byggjebransjen i Italia, og fortel at han blei ein dyktig bygnings­arbeidar som var flink med gips, parkett og maling.

I september 2022 skal han ha prøvd å få seg jobb i Norge, utan at det materialiserte seg.

Han heldt fram med å jobba i Italia, men då pandemien slo inn våren 2020 forsvann inntekts­grunnlaget.

Renoveringsjobb

Ei stund ut i forklaringa fortel han at han, meir eller mindre tilfeldig, fekk tilbod om ein renoveringsjobb i Norge, og at han var lova mellom 20.000 og 25.000 euro for dette.

– Eg var utruleg takksam, og kjempeglad. Men eg spurte om det var risiko forbund med oppdraget, med tanke på skatt og sånn. Det blei avvist, fortel mannen.

Turen går til Norge i april i fjor. Men på Gardermoen får han ei dårleg kjensle, seier han. Han hadde blitt lova utstyr til å gjera renoveringsjobben med, men i staden er det dykkarutstyr som blir plukka opp.

– Det skjøna eg ingenting av.

– Angst og stress

Turen vestover går saman med fleire andre tiltalte i same sak, mellom anna den 46 år gamle dykkaren, den 33 år gamle kvinna og ein 30 år gammal mann.

Framme på Husnes skal 27-åringen ha sendt melding til oppdrags­gjevaren sin heime i Albania om kva som føregjekk.

– Då fekk eg beskjed om å gjera ein liten jobb, å bera nokre bagar opp i ein bil. Eg fekk melding om å ikkje stilla spørsmål, og blei forsikra om at eg ikkje hadde noko ansvar. Eg kjente på angst og stress, og gjorde som eg fekk beskjed om. Samstundes blei eg lova at renoverings­jobben skulle skje etterpå, seier mannen.

Kvelden enda med at mannen blei pågripen, og sikta for innføring av 150 kilo kokain, saman med fire andre albanarar. Alle fem sit no på tiltalebenken i Hordaland tingrett, og risikerer mange år bak murane.

Ein sjette mann var også sikta i saka. Men han døydde i fengselet, og politiet har lagt bort saka mot han.

– Brukte 35.000 kroner

Aktor Benedikte Hordnes gjorde i innleiings­føredraget sitt greie for korleis dei fem albanarane tok seg inn i Norge, og korleis dei reiste til Vestlandet.

Ho gjer mellom anna greie for korleis det blei frakta dykkarutstyr frå Gardermoen, og at det også blei brukt 35.000 kroner på dykkarutstyr i ein butikk i Bergen.

Ifølgje tiltalen låg 150 kilo kokain gøymd i saltvassinntaket på skipet «Nordloire», og henta opp av den 46 år gamle dykkaren. Stoffet blei teke inn til vasskanten på Husnes, og lagt i ein bil.

Politiet, som hadde spana på albanarane, slo til kort tid etterpå, og pågreip dei tiltalte.

Tre av dei fem tiltalte nektar straffeskuld.

Totalt er det sett av ti dagar til saka i Hordaland tingrett.

Saka held fram onsdag.