– Eg erklærer ho for opna

Lenge har det vore jobba for å få på plass den nye sykkelløypa ved skulen på Halsnøy, og endeleg var det duka for offisiell opning.

Fagleiar førebygging ved Kvinnherad politistasjon Are Uppheim, fekk det ærefulle oppdraget med å opna løypa offisielt. Fleire frå kommunen var også med for å kasta glans over den store hendinga.

Både ordføraren, Hilde Enstad, varaordførar, Leif Sverre Enes, og sektorleiar for Teknikk og miljø, Sigbjørn Øye var til stades. Sektorleiar for Oppvekst, Anne Sofie Bjelland Kjeka, kunne diverre ikkje stilla, men Hilde Kjelstrup var på plass på vegne av sektoren for å overrekkja ein blåbærbusk til den komande frukt- og grønsakhagen.

Snorklipp

Før snorklippen nytta derimot politiet høve til å snakka litt om kor viktig det er med hjelm.

– Eg er veldig glad i aktivitet og eg er veldig glad i sykling. Eg er også spesielt glad for å sjå at dei syklane de har fått frå fylkeskommunen har ein hjelm hengande på. Sjølv eg som er vaksen brukar alltid hjelm når eg syklar, og når eg kjem hit anten på patrulje eller privat så håpar eg å sjå mange i løypa og at alle brukar hjelm, understrekar Uppheim.

– Gratulerer med ny løype, eg erklærer ho for opna, seier Uppheim før polititsperringa vert klypt, og løypa offisielt opna.

Etter snorklippen sykla Uppheim, saman med elevrådsrepresentantane Amalie Seberg Fjelland og Mateo Herskedal Fjærland, ein offisiell fyrste runde i løypa.

Heider

FAU-representant Silvia Tofte tok ordet for å heidra alle som har vore med og bidrege, og snakka om kor kjekt og viktig det er når så mange går saman og kan bidra med det dei er gode på for å nå eit felles mål. Men Tofte vart også sjølv heidra for sin innsats for prosjektet.

– Det kjenst veldig godt å få koma til fyrste milepåle, noko som også motiverer til fortsetjinga med å få finansiert og laga gapahuken, grønsakhagen og frukthagen. Elevane skal byrja allereie no med å dyrka grønsaker som dei skal bruka i mat og helse til hausten, fortel Tofte engasjert.

– Me fekk mange kjekke sponsorar til både i dag og dette prosjektet, og ei stor takk til bedriftene i kommunen som har vore med og bidrege. Det å ha eit slikt tilbod lokalt som ikkje kostar noko, som gjer ein kan gå ut her og vera på ettermiddagane, men også at me har fått ein aktivitet til i skulen, er veldig kjekt, avsluttar ho.