– Eg er strålande nøgd

Denne veka har Landsskyttarstemnet 2022 blitt arrangert i Bodø.

Tre skyttarlag frå Kvinnherad, med totalt 14 skyttarar, har delteke på stemnet som har gått sidan 30. juli til i dag, fredag 5. august.

Fleire av skyttarane frå Kvinnherad skaut godt og kom til finaleskytinga. Mellom anna skaut Arnt Orholm (V65), Ørjan Almeland Sjo (M) og Leif Skeie (M) seg til finaleskyting i felt.

Og for ungdommen i Kvinnherad skyttarlag gjekk det særs bra i finalane. I feltskytinga, som hadde finale på stemnet sin siste dag, vart det ein solid andreplass i hans klasse, eldre junior.

– Eg hadde ikkje rekna med at det skulle gå så bra, særleg ikkje i dag, fortel Andreas Hus Hansen på telefon då første etappe av den lange heimreisa frå Bodø er i gong.

Vil bli betre

Og det er særleg feltskytinga er han nøgd med.

– Eg har ikkje trent så mykje felt i år, så eg er overraska over at det gjekk så pass bra. Eg fekk ein 13. plass på bane og ein 2. plass på felt, noko som er veldig kjekt når eg reiste opp med mål om å koma til begge finalane, seier han.

På bane tykkjer han sjølv det gjekk litt dårleg, særleg på kne-skytinga. Andreas samanfattar likevel erfaringa som god, og legg til at det har vore veldig fin stemning blant deltakarane frå Kvinnherad.

Heimreisa tek eit lite døgn, og når han er heime att blir det rett attende i trening.

– Når eg kjem heim blir det å trena på bane mot neste stemne, som er Westcon Cup på Stord neste helg. Eg tenkjer å satsa på skytinga og vil prøva å bli betre, slik at eg kan gjera det endå betre neste år, forklarar Hansen, før han konkluderer:

– Det er jækla gøy når det går så bra!

Grenda kjem attende med alle Kvinnherad-skyttarane sine resultat frå Landsskyttarstevnet 2022.