– Eg elskar å vera her i timevis!

– I dag er det så fint vêr, så alle ungane er ute, seier einingsleiar Lilli Britt Urheim då Grenda kjem på besøk.

Før det ber ut i septembersola får lokalavisa sjå det oppgraderte kjøkenet, det nyslipte golvet i gymsalen og ikkje minst det nye e-sport rommet som er i flittig bruk kvar fredag.

– Her er seks maskinar på plass, og Minecraft er installert på dei alle, ler Urheim etter å endeleg ha funne lysbrytaren.

Sjølv om elevane truleg meiner at det viktigaste såleis er i hamn, er ikkje spelerommet heilt ferdigstilt enno. Mellom anna skal hemsen møblerast, ein stad som også vil kunna bli brukt til meir analoge spel.

Uteleik og full energi

Vel ute frå den mørke spelebula er elevane, fem aldersblanda lag, oppslukt i ein leik.

Lærar Ragni Hestad bles i fløyta for å gje neste oppgåve til ungane. Dei skal gå fort over til skogen ved barnehagen og finna noko som kan bli til hovudet på eit dyr dei held på å laga. Til sist skal dei ha laga kropp, bein, auge, nase, hovud og hale på eit dyr utav det dei finn i skogen.

Unytta barnåler, kongler, pinnar, steinar, gras og mose ligg til slutt strøydd utover den raude løpebana, ved sida av dei flotte naturdyra til elevane. Dei ulike gruppene skal dernest gå rundt til dei andre gruppene og gjette på kva dyr det er dei har laga, og eitt av laga går til sist av med sigeren.

Medan dei utfaldar seg både fysisk, sosialt og kreativt fortel Anette Hauge Upton litt om erfaringane dei tilsette har gjort seg den siste månaden.

– Det har fungert veldig bra, og ungane synest det er gøy. «Hæ, skal me heim allereie no?» spør dei når skuledagen er over, ler ho.

Før den nye skulekvardagen tok til var det nokre som bekymra seg for om borna skulle koma trøytte og slitne heim etter å ha vore på skulen frå klokka 08.00 på morgonen til 15.45 på ettermiddagen.

– Men det har heller vore tvert om, seier ho og får støtte av Ragni Hestad og Laila Ljostveit.

Gode greier

Det lir mot slutten av nok ein skuledag då Grenda vitjar Hatlestrand, men energinivået må likevel seiast å vera på topp. Og medan dyra blir fullførte har nokre av elevane litt på hjarta om korleis det har vore å gå over frå vanleg til heildagsskule.

– Eg elskar det. Det er veldig fint med varm mat, og eg elskar at me må vera her i timevis, smiler ein oppglødd Jacob Svåsand Røssland.

Jacob går i 2. klasse, men vil helst bli presentert som ein tiandeklassing, noko bladfyken har null problem med.

Dei andre på laget hans, Ingrid Emma Aggvin (1. kl), Milena Romero (3. kl), Franek Ostrowski (5. kl) og David Jacobsen (6. kl) er samde i at heildagsskule er gode greier.

Kjekke aktivitetar i skuledagen

På neste lag kjem dei med fleire grunnar til at heildagsskule er ein positiv ting.

– Me har fått meir fritid på skulen, seier Live Marie Vangdal etter å ha tenkt seg litt om. Ho går i 5. klasse og har nokre år på vanleg skule å samanlikna med.

Sena Bakri frå 6. trinnet er samd.

– Me får dessutan ha kulturskule i skuletida, noko som er veldig kjekt, legg ho nøgd til.

Storm Connor Hauge Upton vil ikkje luka bort noko som helst når han fortel kva han tykkjer om den nye skulekvardagen.

– ALT er veldig gøy! seier han, medan jamgamle Mathea Mælen Femsteinevik (3. kl) nikkar.

Mange moglegheiter

Kvar dag er det lagt opp til aktivitetar, og stort sett er alle elevane saman i tida utanom læretida. Dei et varierte måltid med varmmat i kantina kvar dag, og på fredagane er e-sport rommet ope, førebels berre for dei eldste elevane.

Kulturskulen har undervisning med alle elevane på skulen kvar veke, og både basseng og gymsal er i bruk.

– Bassenget kjem Iallfall til å bli brukt frå etter haustferien. Fram til dess har me bading ute, smiler Lilli Britt.

Medan skuledagen går mot slutten klarar bladfyken å gjetta seg til eit pinnsvin og ein lama. Begge deler på første forsøk.

– Korleis klarte du det? utbryt ein imponert lamaskapar, Lars Ask.

Han går i tredje klasse og har sjølv hatt lama. Han veit såleis svært godt korleis dyret ser ut, og anatomien som ligg dandert utover den raude løpebana er ikkje til å ta feil av.

Ein lang skuledag går mot slutten

Elevane spring energisk mot klasseromma for å henta sekkane sine. Malene Karlsen Solsvik (3. kl) har det ikkje travelt, og tek omvegen innom klatrestativet før ho plukkar opp sekken sin.

Som i eit siste forsøk på å kvitte seg med litt energi stiller fleire av jentene seg opp mot veggen, på hendene sjølvsagt, medan dei ventar på bussen, på å bli henta eller på å gå heim.

– Ta bilete av oss no då! ropar dei blidt, medan den eine etter den andre veltar ned og sprett opp att.

Ganske avmålt sit Leah Hjortland og ventar på bussen. Ho er ein av to elevar som går i sjuande, og skulle truleg hatt litt av det overskotet dei yngre medelevane hennar skiltar med.

– Eg trenar volleyball tre dagar i veka, og når skuledagen varar så lenge blir det berre ein til halvannan time heime før eg må tilbake hit att. Så eg er litt meir trøytt på ettermiddagane no enn eg var før, medgir ho.

Leah skulle ønskt ho var meir heime, men har også litt skryt å koma med.

– Maten er til dømes ganske god, sluttar ho, før bussen kjem for å plukke opp dei siste elevane for dagen.

Over all forventning

FAU ved Hatlestrand skule stiller seg bak erfaringa om at den første tida med heildagsskule har gått over all forventning.

– Det er berre positive tilbakemeldingar å få, sjølv om det sjølvsagt er ein omstilling for alle og kanskje spesielt dei eldste elevane. Rektor og lærarar er veldig positive og har gjort ein formidabel innsats for å få dette til å fungera for alle, skriv Olve Vangdal, som har vore Fau-leiar dei to siste åra, i ein e-post til Grenda.

Personleg meiner han at kvardagane til familien har blitt rolegare og at den sokalla tidsklemma har blitt redusert.

– Eg hadde gjerne trudd at det blei litt slitne og sosialt mette barn med heildagsskulen, men inntrykket mitt er at elevane blir enno meir samansveisa og dei er veldig klar for meir sosialt samvær etter middag, held han fram.

På vegne av FAU understrekar han at skulen deira alltid har vore god, både med tanke på resultat og på det sosiale.

– Det som er gjort så langt med heildagsskulen forsterka berre at det er ein flott skule, flotte tilsette og dei har klart å bli endå betre, sluttar han.