– Eg både jubla og grein
Tysdag ettermiddag kunne NRK melde om at dei såkalla Fosen-aktivistane vart frikjende i Oslo tingrett. Motvind Norge-medlem og medaksjonist frå Kvinnherad Annemor Ekeland jubla høgt då ho høyrde nyhendet.
– Eg både jubla og grein då eg høyrde det på radio på veg heim. Dette er heilt fantastisk, og sjølvsagt heilt rett. Eg er veldig rørt, og eg må rosa desse ungdomane som har stått i dette her. Det er berre til å fryda seg i dag, fortel ei strålande nøgd Ekeland over telefon.
Ikkje nok ros
Annonse
Ekeland var med og aksjonerte ved den fyrste aksjonen oppe ved Fosen i februar for to år sidan. Der vart ho verande i litt over ei veka og ho fekk også helsa på dei som er direkte råka av saka.
– Då eg var der oppe og fekk snakka med desse folka så blei eg veldig forsterka i mitt ynskje om å hindra at Kvinnherad også skulle bli utbygd. Det var seks mil med asfalt oppi der, med vegar som var breiare enn dei me har her. Eg såg så tydeleg korleis naturen vår ville forsvunne i asfalt og betong, fortel ho vidare.
Ekeland kan ikkje få rosa ungdomane som har stått midt oppi dette nok.
– Eg er så imponert over dei, og dei har min fulle respekt. Dei gjev meg tru på framtida og at det ikkje berre er oss gamlingar som kjempar for viktige saker. Det har heilt klart vore ein stor belasting for mange av dei med både skule og eksamenar midt oppi det heile, understrekar ho.
Annonse
– Men eg meiner at dei også har vore med og fått auka folk sin respekt for samane sin kultur og levemåte. Aksjonen dei hadde i Oslo var på mange måtar ein veldig viktig kamp, fortset ho.
På tinningen
Tidlegare i mars, like før rettssaka skulle starte, vart det klart at dei stridande partane i Fosen-saka var komen til einigheit. NRK kunne då melde at partane var blitt einige om økonomisk kompensasjon, samt at reindriftseigarane også skulle få ta i bruk eit tilleggsareal til vinterbeite. Denne løysinga er det mange som ikkje er nøgde med, inkludert Annemor Ekeland.
– Det der vart ei løysing med pistol på tinningen. Myndigheitene sette så sterke krefter inn at motstanden vart for diger. Dei må frakte dyra i trailer for å koma til nye beiteområde, dette er ikkje ei god løysing, poengterer ho.
No håpar ho at staten godtek dommen og ikkje ankar saka vidare.
– Det var godt med ein siger no og at dei ikkje vart dømd nord og ned i retten. No håpar eg inderleg at staten ikkje ankar og at dei aksepterer at dette var ein lovleg aksjon. Dei hadde ikkje respekt for høgsterett, men kanskje dei har respekt for denne dommen i det minste, seier Ekeland.
Annonse
Seinare i april skal Motvind Norge ha sitt årsmøte i Alta, då har Ekeland planar om å ta turen oppover som delegat frå Kvinnherad.
– Utan at eg veit heilt sikkert, så reknar eg med at det kjem til å bli markert sterkt på årsmøtet. Det var jo ungdomane som køyrde dette løpet, men me var der på andre måtar. Dei vann! Me vann! jublar Ekeland i gledesrus heilt på tampen.
