Dyrisk bonusattraksjon på Folgefonnsenteret
Dei nær 100 turistane som var innom Folgefonnsenteret i helga fekk seg ein ekstra, kuriøs oppleving på inngangsbilletten. Ein nyfiken røyskatt haldt nemleg hus der frå fredag til søndag.
Publisert
Sist oppdatert
Den vesle krabaten vart observert i 1. etasje mellom resepsjonen til turistinformasjonen og kafeen Verven. Passasjen mellom desse areala vart difor lukka, for at røyskatten ikkje skulle forvilla seg inn i andre deler av lokalet, og slik at dei lettare kunne få han ut.
Theodor Bartlett Enes Mehl (18), som har sommarjobb ved turistkontoret, fekk først høyra om røyskatt-besøket då han var innom på jobben laurdag.
Annonse
– Då var eg berre innom ein liten tur, og Markus og eg prøvde utan hell å finna ut kor den var. Eg såg den for første gong på søndagen. Då opna vi branndøra der og la fram litt mat for å lokka den ut, fortel ungdommen frå Rosendal.
Røyskattvakt
Arbeidshelga blir trekt fram som noko spesiell. Mellom anna nytta Theodor ei god stund på søndagen til å sitja røyskattvakt. Det vil seie å sitje på ein stol og sjå etter røyskatt gjennom ei glasdør.
– Og dette fekk du betalt for?
Annonse
– Ja, ler han, før han legg til:
– Det vart mi oppgåve å sjå om røyskatten kom seg ut. Men det tok si tid og vart litt av ein tolmodsprøve, medgir han.
Då Theodor endeleg fekk auga på den vesle sjarmøren var han kjapt oppe med mobilen og fekk såleis dokumentert det spesielle besøket.
På oppførselen til røyskatten verka det som at interessa var gjensidig.
– Den stod og kikka opp på meg, og verka eigentleg ganske nysgjerrig, forklarar 18-åringen.
Mange ville sjå
Annonse
Sussi Bodin, som også var på jobb gjennom helga, tykte det var eit forunderleg besøk.
– Den stod der og kikka særleg etter Theodor, «The røyskatt man», det var heilt spesielt, smiler ho.
Turistane som var innom Folgefonnsenteret tykte også det var fornøyeleg, og mange av dei freista å få eit glimt av røyskatten.
– Det har vore ein stor attraksjon i helga, slår Bodin fast.
Enden på visa var at Sussi og hennar kollega Ellen fekk auge på røyskatten, og klarte å jaga den ut, før dei stengte igjen branndøra. Utom døra venta den kulinariske lokkematen; eit lite herremåltid beståande av laks og hjortekjøt.
Sjølv om kjennskapet breidde seg over tre heile dagar, vart det ikkje til at røyskatten fekk seg noko namn.
Annonse
– Dåpen vert ikkje før neste gong vi møtes, sluttar Theodor med eit smil.
