Dugnadsånda lever i beste velgåande

Det er lite som hadde blitt gjort kringom Norges land, utan ei høgst levande dugnadsånd. Heldigvis ser ho ut til å vera nettopp det, også i Uskedalen.

Då Grenda tek turen til jordet oppe på Dønhaug i Uskedalen tysdag ettermiddag, rår det ingen tvil om kva som er nært føreståande. Gjerder er sett opp, både telt og pynt er komen på plass, og Grenda sin utsende journalist vert muntert helsa velkomen av dei etter kvart så kjende fugleskremsla.

Samstemte

Akkurat denne ettermiddagen er det bargruppa som er på pletten for å setja ulike ting og tang i stand.

– Me er veldig klare, og me ligg i grunnen godt an. Pyntegruppa har i alle fall fått gjort ein del, og no venter me berre på scenen. Eg trur den kjem i morgon, seier frivilligansvarleg Anne-Grethe Høisæther.

Trass i at det er opptil fleire hender i sving, så manglar dei endå litt.

– Me skulle gjerne hatt litt fleire ja, spesielt laurdagen når det kjem til vakt og mat, informerer Høisæther.

– I tillegg håpar me no på ei skikkeleg bløyte med tanke på brannfaren og slikt. Så kan helst finvêret koma tilbake på fredag, ler ho.

Med på dugnad denne ettermiddagen var blant andre Åge Lyngnes, Pål Ingmar Haugland og Eirik Fausk. Medan sjefane står i teltet og diskuterer serveringsteknikalitetar, kjempar karane på jordet med alle dei store skilta som skal på plass.

– Me må jo bidra litt i bygda. Så får me håpa på fint vêr, god stemning og masse folk, seier Lyngnes, noko dei hine gutane seier seg einige i.

– Det er kjekt å vera med og sjå at det vert noko av, legg Haugland til.

På spørsmål om kva band dei gler seg mest til å få med seg, er dei heilt samstemte. Hellbillies er på toppen av lista.