Du store alpakka for ei utstilling

22 alpakkaoppdrettarar frå Måløy og Gausdal i nord tok turen til Husnes og Kvinnherad Arena for å få stilla ut hjarteknusarane sine. Dei vart tatt godt i mot, på alle vis.

– Det går veldig bra. Her er mykje folk og veldig god stemning. Eg har berre vore med på to utstillingar før, men det er meir publikum her enn me har vore med på dei andre plassane, og det er eit jamt tilsig med nyfikne, sa ei tilfreds Margit Lund-Mikkelson midt i første utstillingsdagen.

Når andre utstillingsdagen er unnagjort, og arrangementet kan oppsummerast, er vurderinga den same:

– Me er strålande nøgde, og det har gått over all forventning. Me har hatt mykje publikum og fått gode tilbakemeldingar. Og me har fått publikumsrekord for alpakkautstillingar i regi av Den Norske Alpakkaforening, seier Lund-Mikkelson nøgd.

Publikumsrekord

– Me var litt spente på om det kom folk, for det er litt eksotisk med alpakka for oss her vest. Det var mange som med på nybyrjarkurs på fredagen, inkludert ein del lokale. Me håper interessa breier seg her lokalt, for det hadde vore kjekt med eit større miljø i Kvinnherad også, seier ho.

– Det har gått fint, til og med vêret har spelt på lag. Ein får alltid litt endringar som fører til forseinkingar, spesielt at det er dyr som må over ein annan fargeklasse, men det har også blitt handtert godt, forklarte Lund-Mikkelson på laurdagen.

Då var alle alpakkaane i elden i løpet av dagen, med dommarvurdering av kvart einaste dyr. Søndag var det gjennomføring av fargechampionat, der dei vel ut dei beste dyra i kvar fargeklasse.

– Kvit ull er den klassen det har blir avla lengst på og er høgast konkurranse i. Fibrane i svart og grå er det vanskelegare å oppnå same kvaliteten på, då dei ikkje har blitt avla på like lenge, forklarer Margit Lund-Mikkelson og Kristine Heimvik.

Lokal 3. plass

Utstillinga er med på å finna fram til dei dyra som det er gunstig å avla vidare på.

– Me får sett på korleis me ligg an. I England og Australia har dei avla lenger på desse dyra enn me har i Norge, og då er det der den største kompetanse finns. Du lærer deg etter kvart å sjå mykje sjølv, men det er kjekt å få ein profesjonell dommar til å vurdera dyra, slik at me ikkje driv og avlar på dårlege dyr, meiner Kristine Heimvik.

Dommar Tim Hey kom heile vegen frå England, og gjorde ein framifrå jobb inne i utstillingsområdet. Alle dyra fekk tilbakemelding, uansett kva type sløyfe eller premie dei kvalifiserte seg til.

Den einaste lokale alpakkaen som plukka med seg noko, var Ella frå Heimvik Alpakka på Utåker.

– Wilma vart diska grunna knekt hale, men Ella fekk ein tredjeplass. Begge desse var fødde i fjor sommar, så dei rundar snart eitt år, fortel Malene Heimvik,

Ho er dotter til Kristine, og gjekk i ringen med dei to lokale deltakarane.

– Det er Ella som er stjerna i dag, legg 20-åringen til.

Referansar

Dei lokale arrangørane Margit Lund-Mikkelson og Kristine Heimvik har begge ti dyr kvar, i tillegg til å ha ein alpakka i lag. Altså 10,5 dyr kvar.

– Det kjem fem dyr til i løpet av våren og sommaren, så det blir 15,5 alpakkaar for oss, smiler Kristine.

Ho syns utstillingar og kåringar som denne i helga er nyttig for Heimvik Alpakka.

– Det er viktig for oss å finna ut korleis me ligg an med tanke på vidare avl. Når me har desse referansane, kan forbetra oss. Me ynskjer å driva aktiv alpakkaavl, og då er dette nyttig for oss, seier Kristine Heimvik.

Gjennomføringa viser seg å vera meir eller mindre prikkfri.

– Alle skrøyt over lokale, og over velvilja til dei tilsette ved Kvinnherad Arena. Me sette nok Kvinnherad litt på kartet på dette viset, trur Lund-Mikkelson, som også rosar Arne Torget, som var med konferansier og mikrofontytar på laurdagen.

Kvinnherad Arena-leiar Daidalos Dahle er glad for å få brukt hallen på dette viset.

– Me ser me når ut til mange som ikkje har vore her før med dette arrangementet. Eg syns det forpliktar når kommunen har brukt så mykje pengar på Kvinnherad Arena, då må me nå ut til flest mogeleg. Hallen er bygd for belastinga, og me har førebudd oss godt. Eg er trygg på ar det er ein like fin hall etter alpakkaane har reist, sa Dahle på laurdag.