Driv service og reparasjonar på kraftverk over heile landet

Ifølgje Brønnøysundregistrene driv Hydro-Ren AS med tilsyn og vedlikehald av vasskraftverk. Bedrifta vart etablert i oktober 2020 av Anders Godtskalk Gjerde, men eigentleg starta det heile fire år tidlegare.

– Eg byrja med dette i 2016. Då fekk eg spørsmål frå Småkraft AS om dei kunne hyra meg inn til å ta nokre småoppdrag, mellom anna gjaldt det service på nokre turbinar. Då fekk eg åtte kraftverk som eg skulle sjekka. Så i 2020 lyste dei ut ein serviceavtale, og då vart det plutseleg større og meir seriøst. Difor etablerte eg AS-et då, fortel 45-åringen frå Austrepollen.

Hydro-Ren AS fekk eg tilslaget på kontrakten, som i byrjinga omfatta så mange som 60 kraftverk med service annakvart år. Etter kvart har det blitt gjort nokre endringar i opplegget, slik at Anders Gjerde i år skal yta service på 36 av Småkraft AS og Forte Vannkraft AS sine anlegg. Dei ligg på strekninga Sirdal i sør til Sunndalsøra i nord.

Meir omfattande

Anders Gjerde kan elles skilta med 16 års fartstid hjå giganten Statkraft. Han var tilsett der også etter at samarbeidet med Småkraft kom i gang.

– Arbeidet for Småkraft tok eg på kveldstid og i helgar. Dermed hadde eg to jobbar fram til sommaren 2023. Då vart det så mykje å gjera at eg måtte bestemma meg for kva eg skulle satsa på, fortel han.

– Kvifor valde du ditt eige firma?

– Det er jo noko med at ein er redd for å angra på at ein ikkje prøvde. Og så er det kjekt å skapa noko sjølv, smiler Gjerde.

Utanom at sambuaren ordnar med rekneskap og anna papirarbeid, har ikkje Anders Gjerde andre tilsette. I dag leiger han inn folk etter behov. Men det kan endra seg.

– Eg vil prøva å få tilsett fleire, for eg treng hjelp, seier bedriftseigaren, og utdjuper:

– Eg har så mange kontaktar i bransjen, at det har blitt mykje meir omfattande enn eg hadde sett for meg. Truleg var det slik at mange ikkje våga å spørja meg om eg kunne ta på meg oppdrag medan eg jobba for Statkraft, men no veit dei at eg er i marknaden.

Vasking av røyr

Sjølv er Anders Gjerde utdanna industrimekanikar, men ute i felten må han også sysla med snikring, sveising, graving og montering. Det er ofte også behov for elektroarbeid, men det har han ikkje kompetanse til. Difor har han inngått samarbeid med selskapet Proxima Hydrotech AS på Seim.

– Dei skaffar meg nokre jobbar, og eg skaffar dei nokre. Vi går i lag for å yta komplett service, både mekanisk og elektro. Det gjev oss eit fortrinn, fortel han.

Ein annan ting Gjerde kan utføra for kraftverka, som ein av få, er sliping av løpehjul.

– Dette er det ikkje mange som driv med, og dei som kunne det har blitt pensjonistar, kommenterer han.

Frå sommaren av skal Hydro-Ren også i gang med vasking av røyr. Firmaet har nemleg avtale om bruk av nødvendig utstyr frå Småkraft AS, som har utvikla og bygd eit system for slik vasking, men som ikkje lenger har folk til å bruka det.

– Det blir nok ikkje så mange vaskeoppdrag på Vestlandet, for her er det stort sett reint vatn. Men i område med myrar og humus, er det større behov. Når det gror inni, så blir effekten redusert, analyserer Gjerde.

Stikkvegane på E39

Hydro-Ren har også andre samarbeidspartar utover dei ovannemnde. Vi kan trekkja fram Hm Energi og Hydrotec-Service. Og for eit anna Kvinnherad-selskap, Energi Teknikk AS på Seim, utfører Gjerde jobbar heilt opp til Alta. Med alt dette og så stor geografisk spreiing, er det ikkje til å koma frå at det blir ein del reisedøger.

– Ja, det blir veldig mange kilometer. For å seia det sånn; eg kjøpte ny bil i november, og den har allereie passert 8.000 kilometer. Og då har det vore fleire friveker i denne perioden. Viss nokon lurer på stikkvegane til E39, er det berre å ringa meg. Eg har nok vore på dei fleste av dei, humrar Anders Gjerde.

For å overdriva litt, er det vel nesten berre i Kvinnherad han ikkje har oppdrag.

– Den private marknaden har eg ikkje prøvd meg på. Eg må fyrst ta meg av det eg allereie har av arbeid, forklarar han.

Når sant skal seiast tek han servicen på eitt kraftverk i Kvinnherad også. Det heiter Gjerde kraftverk og står heime på tunet i Austrepollen. Anlegget starta opp i 2007 etter at seks fallrettshavarar inngjekk samarbeid med Småkraft. Gjerde kraftverk produserer 5,7 GWh i året, noko som tilsvarer straum til 356 husstandar.

Oppgradera Jukla

Som kjent førde uvêret førre veke til stengde vegar til og frå Mauranger. Anders måtte difor utsetja ein planlagt tur til Setesdalen. Men denne veka er han og ein kollega på reisefot, for å utføra service på nokre anlegg.

– Det blir nesten som service på bilen, for vi skal skifta olje og filter, smiler han. Slik service blir utført i intervall på to til tre år.

Sjølv om Hydro-Ren ikkje har kapasitet til å vedlikehalda større kraftverk åleine, ventar ein stor jobb til våren. I 2024 er det 50 år sidan straumen frå Mauranger-anlegga kom på nett, og det er behov for ei stor oppgradering av Jukla kraftstasjon.

– Voith har kontrakt på oppgraderinga, og dei er interesserte i å ha meg med på jobben, opplyser Anders Godtskalk Gjerde.