Doblar kapasitet på fôrflåte
Svært mykje av aktiviteten til Hellesøy Verft er flytta til Årsnes, men eit pilotprosjekt for eit oppdrettsselskap blir gjort ved kaien på Løfallstrand.
Publisert
Kaikapasitet er førebels ei mangelvare for Hellsøy Verft på Årsnes. Difor blir arbeidet med ein fôringsflåte gjort ved det gamle verftsanlegget.
– Det er eit pilotprosjekt for eit oppdrettsfirma, der me skal sjå om me klarer å dobla kapasiteten til ein fôringsflåte. Ei slik dobling vil i praksis bety at ein kan halvera talet på turar ut til flåten med fôr. Det ser ut som at me har klart å få det til, og kanskje auka kapasiteten litt utover doblinga også, seier Frank Søllesvik.
Annonse
Færre turar med båt betyr mindre utslepp.
– Det er dette eg liker med berekraft. Det er mykje grønvasking der ute, men dette er ekte berekraft. Det er ei reell redusering av utslepp, for ein sparer seg for mange kilometer med båt, påpeikar Søllesvik.
Arbeidet med flåten skjer etter eige design frå Hellesøy Verft. I tillegg til ombygginga, som skjer i Kvinnherad, har Marine Eigedom kjøpt ei bedrift i Polen som produserer fjernstyrte fôringsluker til å ta i mot maten. Hellesøy Verft har gjort ingeniørarbeidet til jobben sjølv.
– Allereie no ser me at dette blir veldig bra. Me gjer mykje innomhus, men det dryp på fleire lokale underleverandørar, for me skal byggja eit hus oppå her, og kjem til å bruka lokale elektrikarar, røyrleggjarar og snikrar til det, til liks med lokale transportfirma. Me er veldig opptatte av å bruka lokale underleverandørar, noko mellom anna nyttar me HT Industri, som også er på Årsnes, til mykje. Det er noko som gir oss gode synergieffektar, sluttar Søllesvik.
