Dobla kapasiteten til fôrflåte

Fôrflåten til Mowi vart tatt i bruk i 2002. I fjor haust vart han taua til Hellesøy Verft på Løfallstrand for å oppgraderast. Sidan då har verftet fått nytt namn og flåten nytt liv.

– Dette er ein betongflåte som hadde betongtankar til fôret. Me fjerna 240 tonn vekt då me tok vekk tankane. Bygget og tankane me har erstatta det med, er på 30 tonn. Såleis har ein no lov til å ta kapasiteten frå 170 tonn til 350 tonn fiskefôr, seier prosjektleiar Jostein Økland.

Spesialprofilar

Skroget er intakt som då det vart bygd, men alt av overbygg er endra.

– Halsnøy Betongsaging tok ned det som stod. Noko av det geniale med dette er at alt me tok av flåten også blei bruk på. Det låg nesten ingenting igjen her, alt vart gjenbruk. Det er dermed stor miljøgevinst på prosjektet også. Til og med betongen ein skar opp forsvann på bilar av garde. Hadde eg ikkje budd så langt vekke, så hadde eg sett meg syn med det eg også, seier bømlingen.

Det som er bygd opp igjen, er laga med spesialprofilar i aluminium, produsert ved ECG sitt anlegg på Årsnes. Dei blir mellom anna nytta i tankane, som skal ha opp i 80-90 tonn innhald i seg.

– Det kan godt vera at det er Husnes-bolt som blir brukt på dette. Ein nyttar ei spesiallegering her for å få rette hardheita og styrken i materialet, forklarer Økland.

Vanlegvis forsyner ein slik flåte 6-8 merdar med fôr.

Innsparing

Gjenbruk av flåte er nytt for både ECG og Mowi.

– Dette er for Mowi, men eg har kontakt med andre oppdrettarar som er interesserte i å gjera liknande. Det er jo ikkje ein ny flåte, men det er likevel innsparande for eigaren. Arbeidsmiljøet til dei som skal jobba her har også noko å seia, og dei blir nok happy med nytt hus. Og så pushar dei som sit igjen på dei gamle flåtane på for å bli oppgraderte dei også, meiner Økland.

Den viktigaste grunnen for at denne oppgraderinga blir gjort, er likevel økonomi.

– Mowi ein flåte til ein tredjedel av det ein ny flåte kostar. Me har opsjon på å gjera det same med fire andre slike flåtar, og håper å få avtale på dette på plass. Den me er ferdige med no skal inn til Svåsand, og så håper me at me kan ta tilbake flåten han erstattar til Løfallstrand for å ta den. Verftsområdet her på Løfallstrand godt eigna til slikt arbeid som dette, meiner prosjektleiaren.

Det er lokale firma som har i stor grad fyller opp lista over underleverandørar. Reco har hatt innreiinga, Into har tatt røyr og elektro, medan Aritec står for ventilasjonen. Scale har levert sjølve fôringsanlegget.

Nøgd kunde

Leiar for teknisk avdeling i Mowi region sør Aasmund Femsteinevik gler seg over oppgraderinga.

– Dette aukar mengda fôr me kan lasta. Det gir oss større fleksibilitet, sparer turar på fôrbåten, og gir buffer som noko er forseinka. Ombygginga fører også til nye fasilitetar for dei tilsette, med nye kontor, opphaldsrom, kjøkken, garderobar og toalett, og generelt meir plass for dei, seier Femsteinevik.

Opsjonane på fleire ombyggingar er ikkje avgjort enno.

– Me skal ta i bruk denne, og så ser me om den er slik som tenkt og bør, før me avgjer opsjonane, seier hatlestrendingen.

Han er godt nøgd med samarbeidet med ECG.

– Eg syns har vore veldig bra. Dei er løysingsorienterte. Det har rett nok gått litt lenger tid enn tenkt, utan at det har vore eit problem for oss i denne omgang, då me ikkje har vore avhengige av å få flåten på plass til ei bestemt tid.