Diskuterte rammevilkår med stortingsrepresentant
Måndag fekk Kvinnherad Arbeidarparti besøk av stortingsrepresentant frå Hordaland Arbeidarparti Lubna Jaffery. Det gav høve til å diskutera utfordringar.
Publisert
– Me har godt av å koma ut og treffa folk, og sjå kva ting handlar om, seier Jaffery om besøket i Kvinnherad.
Ho brukte heile dagen i Kvinnherad, og snakka først med partikollega og ordførar Hilde Enstad, og toppkandidatane til partiet ved det komande valet; Thea Vaage og Per Harald Havnen Löfgren Johansen.
Annonse
Jaffery var seinare på besøk i ein SFO, hos BUA og avslutta med å delta på årsmøtet til Kvinnherad Arbeidarparti.
– Handlefridom
Rammevilkåra og overføringane frå staten, som regjeringa onsdag varla at dei kom til å endra i litt betre favør kraftkommunane, vart eit tema for diskusjon under besøket.
– Eg forstår frustrasjonen over at dette blei som det blei. Me er i ein ekstraordinær situasjon, og det gjer at alle må vera med og bidra meir, og så vert kraftkommunane råka ekstra hardt, oppsummerte Lubna.
Annonse
– Då ein bestemte dette oppunder nyttår, var det sagt at ein skulle følgja nøye med på situasjonen. No er kraftprisen langt frå like høge som dei var då ein vedtok kutta i overføringane, noko som endrar føresetnadane for vedtaket. Dette er store summar for Kvinnherad, og det går rett inn på tenestetilbodet, erkjente Jafrey vidare.
Ho ynskte difor at Hilde Enstad skulle koma til Oslo, slik at ein kan diskutera dette med dei som kan løysa situasjonen, og at ein får gjort det fram mot revideringa av statsbudsjettet.
– Me har sagt at me ynskjer ein kommuneøkonomi som gir kommunane handlefridom og høve til å utvikla seg til gode stadar å bu. Det gjeld skular, barnehagar og aldersheimar. Når dette ikkje treff heilt som ein tenkte, så må ein revurdera, sa stortingsrepresentanten.
– Krevjande
Jaffery måtte vedgå at det kunne vera krevjande å vera i regjering når ein får situasjonar som dei kraftkommunane no må handtera.
– Eg har fått eit unikt innblikk i situasjonen til kraftkommunane i Hordaland etter ein besøksturné den siste tida. Men eg er i ein skvis som stortingspolitikar, for eg skal representera innbyggjarane frå mitt fylke, og samtidig forsvara regjeringa. Eg ynskjer jo at regjeringa skal bli sitjande ved makta, og få gjennomført den politikken me har blitt samde om. Eg skal både støtta og utfordra regjeringa, men eg må uansett vera ærleg, forklarte Lubna Jaffery.
Annonse
– Me er veldig glade for å ha Lubna på besøk her, for ho tar godt i mot argumenta våre, og har god forståing for vår situasjon. Ho gir gode råd om korleis me skal jobb inn mot apparatet i Oslo, kommenterte Per Harald Havnen Löfgren Johansen, som er Kvinnherad Ap sin varaordførarkandidat til kommunevalet i september.
