Difor opplever Sør-Norge kaosvêr
Vêret har skifta mykje og fort den siste tida. Her forklarar Meteorologisk institutt kva som er moglege årsaker.
Publisert
Sist oppdatert
Dei siste par vekene har både Kvinnherad og resten av Sør-Norge gått frå kaldt vêr og mykje snø, til plussgrader og regn. Ifølgje meteorologane er det polarvirvelen som styret vêret hjå oss. Polarvirvelen er ein stor luftsirkulasjon som ligg rundt polområda. Denne sirkulasjonen held til vanleg den kalde lufta i polarområda isolert frå varmare luftmassar lenger sør. Men nokon gonger kan polarvirvelen bli svekka, og få den kalde lufta til å bevega seg sørover.
– Det mest sannsynlege er at polarvirvelen blir påverka av ein forsterka drivhuseffekt og global oppvarming. For å seia det sånn, eg forventar at alle naturlege fenomen og variasjonar vil bli påverka når kloden blir varmare, seier klimaforskar Rasmus Benestad i ei pressemelding frå Meteorologisk institutt.
Annonse
Smelting av is
Svekkinga av polarvirvelen kan skuldast komplekse atmosfæriske og havrelaterte faktorar. Ei forklaring kan vera smelting av is i Arktis.
«Global oppvarming fører til auka smelting av is på land og i sjø i Arktis. Dette reduserer isen si utstrekning og tjukkleik, og den reduserte utstrekninga av sjøis kan påverka atmosfæren sitt sirkulasjonsmønster», vert det opplyst.
Andre forklaringar er temperaturforskjeller, Jorda sin topografi, endringar i havstraumar, og atmosfæriske mønster.
Annonse
«Endringar i vêrtilhøva, inkludert ekstreme kuldeperiodar, kan vera knytt til menneskeskapte klimaendringar. Klimaendringar påverkar det globale klimasystemet, og enkelte område kan oppleva auka ekstreme vêrhendingar som følgje av denne påverknaden. Medan det generelle mønsteret er at gjennomsnittstemperaturen stig på global skala, slik som i 2023, kan klimaendringane også påverka atmosfæren sitt sirkulasjonsmønster som i korte periodar kan medføra låge temperaturar og bitter kulde», står det i meldinga.
