Difor ligg Egget utanfor Høylandsbygd

Om bord lekter og slepebåt frå Tronds Marine Service kom det berømte Egget til Høylandsbygd på tysdag. Straks skal det vidare til heimstaden i Ølve.

Ovum, tidlegare Hauge Aqua Solutions, fann opp og designa det lukka oppdrettsanlegget som fekk namnet Egget. Herde kompositt i Ølve fekk æra av å byggja piloten, som er 21 meter høg. Sidan sommaren 2022 har anlegget lege til sjøs utanfor Vestnes i Romsdal.

Men tysdag kom Egget attende til Kvinnherad, nærare bestemt Høylandsbygd. Det hadde då blitt slept sørover av «Tronds Fox». Teknisk direktør i Ovum, Åsmund Hellesøy, kan fortelja kva som er bakgrunnen.

– Sidan 2022 har to generasjonar fisk har vore gjennom anlegget, med veldig gode resultat. Samtidig har vi funne ut at vi ynskjer å gjera nokre forbetringar, sjølv om Egget allereie fungerer bra. Det gjeld mellom anna oksygenanlegget og dei andre systema som vi er avhengige av for at fisken skal ha det best mogleg. For å utføra desse endringane, er vi avhengige av å ta Egget på land, seier Hellesøy.

Fleire månader

Ovum konkluderte at det enklaste var å ta Egget ned igjen til Ølve, sjølv om det gjekk eit par dagar å slepa det sørover.

– Tysdag og onsdag var kaien til Herde kompositt oppteken, så difor ligg Egget på vent utanfor Høylandsbygd. Torsdag skal det plasserast i sjøen ved Herde, og dei skal ordna nokre ting medan det ligg der. Så skal Egget opp på land, opplyser Hellesøy.

– Kor lenge vil oppgraderinga føregå?

– Eg er ikkje heilt sikker, men vi snakkar månader og ikkje veker. Dette er også avhengig av når vi skal setja smolt i anlegget igjen.

Samstundes er Herde kompositt godt i gang med egg nummer to, også det skal vera 21 meter høgt. Kunden er oppdrettsselskapet Prophylaxia i Romsdal.

– Arbeidet starta i haust og skal vera ferdig komande haust, altså ei produksjonstid på om lag eitt år. No byrjar Egget bokstaveleg talt å ta form, og for tida står det nokre store konstruksjonar i hallen til Herde kompositt. Dei er vel rundt rekna halvferdige no, vurderer Åsmund Hellesøy.

44 meter

Han har godt håp om at Ovum snart vil sikra seg fleire egg-kontraktar, og då gjerne på utgåva som skal vera heile 44 meter høg.

– Viss det kjem fleire bestillingar i same storleiken som hittil, så er Herde kompositt heilt sikkert klare til å byggja egg nr. 3 og nr. 4. Når det gjeld den største varianten på 44 meter, så er dette del av utviklingsprosjektet saman med selskapet Hofseth International i Ålesund. Vi har allereie eit formelt samarbeid med dei, og dei er også involverte i den tekniske utviklingsprosessen, opplyser Åsmund Hellesøy.