Difor er ikkje Sp med i koalisjonen

Onsdag kveld braut H og Ap forhandlingane med Sp, noko forhandlingsleiar for Ap Synnøve Solbakken grunngav med krav frå Sp som dei ikkje kunne gå med på. Her er Sp sin versjon av kva som skjedde.

Forhandlingsleiaren for Sp, Hans Inge Myrvold, tykkjer det er beklageleg at partiet ikkje vert med i den nye koalisjonen.

– Korleis opplever de dette?

– Me opplevde sonderingane som at det var ønske om å laga eit breitt og godt fleirtal, ein ønskte meir enn eit marginalt fleirtal på 18, noko som var ein god start. Me følte oss trygge på at det var eit fellesskap som ville driva ein aktiv og god politikk for Kvinnherad-samfunnet. Når det grunnlaget bryt saman, så er me veldig overraska, for det står i sterk kontrast til det me opplevde måndag og tysdag. Eg syns det er overraskande at ein hoppar av målet om eit trygt og godt arbeidsklima, seier Myrvold til Grenda torsdag morgon.

To i formannskapet

– Kva krav var det de sette fram som ikkje var løyselege for Høgre og Arbeidarpartiet?

– Me ønskte å byggja ei ramme rundt desse to posisjonane til H og Ap (ordførar Bjørnevik og varaordførar Vaage, red.merk). Me syns det var uklart kva Ap og H ville ha ut av eit samarbeid, og forstod det som eit valteknisk samarbeid med modifikasjonar. Vår jobb var å vera til stades i dei politiske fora der arbeidet vert gjort, og me hadde 2015- og 2019-samtalane med i bakhovudet då me forhandla, seier Myrvold.

Han seier at for å underbyggja ordførarposisjonar til H og Ap, ønske Sp å vera tydelege på at dei ynska to plassar i formannskapet og leiarverv i eitt av utvala.

– Og me ønskte å vera tydeleg på at dersom varaordførar må tre opp eller til side, så var det Sp som skulle ha settevaraordførar. Med atterhald om ein skulle skriva avtale om dette, så visste ikkje me kva politikk som skulle førast rundt neste sving. Me hadde tilført styringsdugleik, med over 20 representantar saman med KrF. Når me skulle forvalta veljarane våre sine røyster saman med våre ønske, så måtte me også ha ei avkasting for dette, argumenterer Myrvold.

Vaktbikkje

– Viktige politiske saker for oss er grunnbemanning i helsesektoren, sikra fagleg og tilstrekkeleg personell i oppvekstsektoren, for me har eit etterslep her, og me ynskte å styrka vilkåra for barn i skulen med å få på plass miljøarbeidarar, samt byggja ned utfordringane rundt ungt utanforskap, utdjupar han.

– Me går frå å vera inne i hundehuset til å bli vaktbikkja utanfor. Me kjem til å vera tydelege på våre forventningar, men ynskjer fleirtalskonstellasjonen lukke til. Det er viktige verv dei har, men me kjem til å vera tydelege kva me ynskjer å få gjennom undervegs, sluttar Myrvold.