– Dette trur vi blir bra!
Orda kjem frå Oddbjørn Kroka etter at han og Hanne i Kroka eigedom AS har overteke motellet og Maram eigedom AS i Rosendal.
Publisert
Sist oppdatert
Overtakinga skjedde fredag 10. juni, til båe partar si glede.
Dei nye eigarane ser fram til å auka overnattingskapasiteten sin, og ønskjer å halda fram med utleige på både kort og lengre basis.
Annonse
– Vi har tenkt å driva det vidare med utleige på same måte, og til hausten og vinteren satsar vi på å pusse opp og gjere nokre oppgraderingar. Huset er i god stand slik det er no, så sommarsesongen kan fint gå sin gong før vi tek til på dette, fortel Oddbjørn Kroka.
Betre kapasitet
Blant anna har Hanne og Oddbjørn planar om å oppgradere kjøken og bad.
– Har de tid til dette?
Annonse
– Ja, vi har allereie tilsett nokre fleire, så dette skal gå fint. I tillegg skal vi leiga folk til å gjera arbeidet, slår Oddbjørn fast, før han held fram:
– Vi har berre fått positive tilbakemeldingar på kjøpet, så dette trur vi blir bra! Vi har ein god del leigeavtalar med arbeidarar og andre gjennom heile året. Med desse utleigemoglegheitene får vi berre meir kapasitet til å husa desse, sluttar han.
Maren Guddal og Arne Martin Guddal Husby, som har drive huset sidan 2016, la følgjande melding ut på Facebook då avtalen var signert:
«Vi takkar for alt som vi har fått vore med på, alle folk som har engasjert seg i det som har skjedd, alle som stakk innom, alle som var nysgjerrige og all kjærleik. No ynskjer vi Oddbjørn og Hanne til lykke med drifta vidare.»
