– Dette trengte me!

Ordførar Hilde Enstad helsa alle gjestene velkommen med ein flott og rørande tale om frivilligheita i Kvinnherad fredag kveld.

– Kjære alle dykk som alltid stiller på dugnad, kvinnheringar som legg ned timar, dagar og år med frivillig arbeid. 2022 er frivilligheitas år, og i dag er det motivasjonsdag for å motivera dykk, for det er nettopp de som er limet i vårt lokalsamfunn. Det er de som er omsorgen i omsorgsarbeid, og det er de som er folket i folkestyret. Det er de som gjer Kvinneherad-samfunnet godt å leva i. Tusen tusen takk for den formidable innsatsen dykk gjer, var noko av det Enstad sa, før ho introduserte kveldens føredragshaldar; Øystein «Pølsa» Pettersen.

Humor og alvor

Når Pettersen kjem på scena, med capsen bak fram, saggede jeans og kvite sneakers, er det lett å tenkja at han skal driva komikk. Men sjølv om han fleire gongar fekk publikum til å dra på smilebandet med historia frå tida som skiløpar og deltakar i underhaldningsprogramma som 71 grader nord og Mesternes mester, fortalte han fleire vonde og rørande historier som fekk fram tårer i salen. Blant desse var historia om då han sjølv fekk hjernebløding for eit år sidan. Han la ikkje skjul på at han hadde trekt eit vinnarlodd.

– Eg hadde griseflaks, sa Pettersen etter å ha delt den tunge og vonde historia om hjerneblødinga, men som han sjølv sa; det er jo eigentleg ei solskinshistorie.

For berre nokre månadar etter den alvorlege hendinga, var Pettersen tilbake på scena som føredragshaldar. Hans bodskap, både før hjerneblødinga og etter, er at folk må gripa dei moglegheitene ein får, og bruke energi på dei tinga ein ynskjer å få til. Denne kvelden tok han opp tema som mål, handlingar, vanar, tankar, prioriteringar, verdiar, tid og standardar.

– For «Lag ein god dag» og den bodskapen der har vore der frå før. Det å ta eigarskap og gripa moglegheitene ein får har vore der heile tida, det blir berre viktigare for meg å dela; me har ikkje så god tid som me trur me har, seier den innleidde inspiratoren.

Eit reaktivt samfunn

I tillegg til å oppmoda alle som var i salen om å nytta tida si godt, som han meiner er den viktigaste valutaen me har, oppmoda han òg om å ha mindre fokus på endringar og gode resultat, og heller fokusere på handlingar og utvikling.

– Resultata er kva både eg og dykk lever av. Men det er ikkje det me lever for. Det er det som ligg bak det å få til me lever for - det å skapa resultata. I dagens samfunn finn me eit suksessomgrep som me har skapt, og som ikkje henger på greip. Og misforstå meg rett, eg er glad i gode resultat, men gode resultat er ikkje det same som suksess, dei gode resultata betyr ikkje nåla i veggen. Me jagar etter pengar, prestisje, titlar, hytte, bil og likes på Instagram. Me må slå opp med desse gode resultata. Suksess skal vera ei kjensle, som skal knyttast opp mot åtferd. Me må stoppa opp, setja den streken og sjå kva me jagar etter, om ikkje blir ein dratt inn i samfunnet som handlar om å tilpassa seg - den reaktive boksen, som eg kallar det, seier ein engasjert Pettersen og held fram.

– Utvikling derimot, det er for alle, men du må aktivt velja det. Folk må skjønne at det som står mellom deg og det som du ynskjer å få til, er vala dine. Det er ikkje endringar som skal til, det er utvikling - den aktive boksen.

Pettersen avslutta med å be dei frammøtte om å gje dei ein er glad i ein skikkeleg god klem, til full applaus frå eit inspirert publikum.

Inspirerte ungdommar

Og blant publikum sat ein gutegjeng frå Trio G15-laget, som etter føredraget kunne fortelja at dei hadde fått påfyll av både inspirasjon og motivasjon.

– Det var trenarane våre som meldte oss på dette føredraget, og det er me glade for no. Me er inne i ein periode der me tapar mykje, som kan vera både tungt og umotiverande, så dette trengte me, seier Brynjar Olderkjær medan lagkameraten legg til.

– Øystein er skikkeleg kul, og veldig morosam. Og det at han var så langt nede, men kom seg på beina igjen, var fint å høyra, og veldig inspirerande. Me har tapt kvar einaste kamp i 1. divisjon, så me trengte denne «boosten». Eigentleg ikkje berre for fotballen sin del, men generelt også, spesielt etter koronapandemien, smiler Jakob Gjerde.

Etter føredraget var det fleire som var oppe på scena for å ta bilete med Pettersen. Deretter forflytta festen seg til Festsalen, der føredragshaldaren var konferansier på dialogkonferansen og festkvelden for 55 av kommunens frivillige.