Dette skal den nye barneskulen på Husnes heita

I oktober i år kunne varaordførar Thea Vaage (Ap) og ordførar Vegard Bjørnevik (H) avsløra at dei inviterte til ein aldri så liten namnekonkurranse for å finna ut kva den nye barneskulen på Husnes skulle heita.

På eit månadleg allmøte for elevar og lærar torsdag føremiddag, fekk representantar frå elevrådet ved Undarheim skule gleda av å informera dei frammøtte om resultatet av konkurransen.

Engasjement

Initiativet, der alle som har ønska har kunna sendt inn forslag til kommunen, har skapt stort engasjement blant elevane, og det har kome titals forslag frå kvar klasse. I tillegg har sju privatpersonar sendt inn forslag til kommunen.

Juryen, som har bestått av representantar frå både skule, politikarar, lokalbefolkning og mållag, konkluderte med: HUSNES BARNESKULE. Namnet var det mange ved Undarheim skule som hadde foreslått.

Semje

Dei tre elevrepresentantane fortel til Grenda at namnet blei akkurat det som dei hadde håpa på.

– Det har vore veldig spennande å få vera med i namnegruppa. Spesielt kjekt sidan eg går i 7. klasse no og ikkje skal gå på nyeskulen, sa Sofia Gotsuliak frå elevrådet.

Ho får støtte frå dei to andre representantane, Sander Stien Thorsvik og Mohammed Dasho, som begge var blant dei som foreslo Husnes barneskule.

– Eg er veldig glad for at det blei Husnes barneskule. Det beskriv godt kor skulen ligg, forklarte Sander.

Mohammed fortel at det kom inn mange gode forslag.

– Det har vore stressande og gøy, sidan det var så mange namn å velja mellom. Men alt i alt så var det flest elevar som ønskte Husnes barneskule, og eg var éin av dei, sa han.

Også ordføraren er nøgd med valet.

– Eg synes namnet er veldig trygt og godt, og er veldig glad for at vi landa på akkurat dèt, fortalde Bjørnevik frå scena.

Det må leggjast til at elevane åleine skal få bestemma namna på dei sju ulike bygningane som skulen består av.