Dette gjeld for koronasmitte no

Grenda har blitt kontakta av somme som har reagert på at tilsette i pleie-sektoren har halde fram og jobba trass i at dei har testa positivt for korona. Kommuneoverlege Glenn A. Opland avkreftar at det er i strid med gjeldande reglar.

– Eg har full forståing for at det kan vera vanskeleg å forhalda seg til det nye regelverket, men det er veldig enkelt: Hald deg heime når di har dårleg allmenntilstand. Elles er det mykje godt rett fram, generaliserer Opland.

Mildare variant

Han utdjupar korleis gjeldande regelverk er.

– No seint i 2022 er ein der at alt skal behandlast som ein kva som helst infeksjon. Føler du deg frisk og kvikk, så kan du arbeida som vanleg. Korona skal behandlast på same måte som andre infeksjonssjukdommar, som til dømes vanleg influensa. God hoste- og handhygiene er framleis viktig, understrekar han.

Opland ser at det kan vera vanskeleg å forhalda seg til at retningslinjene no er veldig annleis det dei var.

– Bakgrunnen for dei noverande retningslinje er at store delar av befolkningar er godt vaksinerte, samt at det viruset som sirkulerer er eit koronavirus som er ein fjern slektning enn det opphavlege. Kombinasjonen god vaksinering og tidlegare sjukdom pluss ein mildare variant, gjer at ein no behandlar dette på eit anna nivå enn i 2020 og 2021. Ein blir ikkje like sjuk av infeksjonssjukdom som ein blei før, forklarer han.