– Dette går på sjølvråderetten laus

Kommunestyret vil ikkje akseptera eit ekspertutval sitt forslag til nytt inntektssystem for kommunane. Skulle forslaget bli vedteke, vil Kvinnherad tapa mykje pengar.

Kommunestyret hadde to høyringssaker oppe til handsaming like før jul. Mange av politikarane var, som tidlegare referert i Grenda, svært negative til forslaget om grunnrenteskatt på oppdrettsanlegg. Dei var slett ikkje anna innstilte til utgreiinga om nytt inntektssystem for kommunane som no er ute på høyring, kanskje heller tvert i mot.

– Det er freistande å starta med «Dette er eit ran», for det er eigentleg det vi snakkar om. Viss ikkje denne saka blir skrota, så skal eg og Per Harald (rådgjevar Per Harald Havnen Löfgren Johansen) stå for vardebrenning. Det er skremmande det som skjer her, sa Gunnar Våge (Sp).

Han passa samstundes på å ikkje leggja skulda på dagens regjering.

– Eg høyrde på bygda at «Det er ikkje anna å venta med denne regjeringa». Men vi må ta med oss at dette starta 12. mai 2020 på oppdrag frå Solberg-regjeringa, understreka han.

Nærmar seg 30 mill.

Ifølgje saksutgreiinga vil ein direkte konsekvens av utvalet sine forslag vera at Kvinnherad kommune får reduserte inntekter frå inntektssystemet berekna til 19,3 millionar kroner for år 1 og 17,4 mill. kroner for følgjande år, samanlikna med dagens ordning. Men grunna betydeleg auke i inntekter frå konsesjonskraft og eigedomsskatt for kraftanlegg, er det god grunn til å tru at den reelle reduksjonen vil bli monaleg større.

«I år med ekstraordinært høge straumprisar må det forventast at reduserte inntekter frå inntektssystemet nærmar seg 30 millionar kroner», står det.

– Eg las at utvalsleiaren hadde sagt at «Kommunane skal få det dei treng». Då vart eg skremt. Altså skal staten bestemma kva Kvinnherad kommune treng. Kva skal vi med kommunane då? Dette går rett og slett på sjølvråderetten laus. Det følgjer ikkje partipolitiske linjer, det følgjer by og land, analyserte Øyvind Lernes (H).

Forslaget til høyringsuttale vart samrøystes vedteke.