Dette er uttalen om kraftlinja

Sauda-Blåfalli

Om alternativa 1.0, 1.3, 1.3.1, generelt:

Desse traséane følgjer i stor grad gjeldande trasé for dagens linje og vil i liten grad gå inn i urørt natur. Det er positivt at linja ved passering av Åkra vert flytta opp frå der folk bur. Ved ei utgreiing av traséen børt det ettertraktast at linjetraseen vert trekt så langt som mogleg opp ifrå bygda.

Om Alt. 1.0:

Frå Øvstebøstølen går linjetraseen til Alt.1.0 vidare vest for Vikastølen, over Bergstølsåta og Veslafjellet før den går ned Skavdal. Mellom Skavdal og Øvstebøstølen går den føreslegne linjetraseen i eit område der den vil vera markant og ruvande i terrenget, den vil vera godt synleg i terrenget frå avstand, og vil ha stor innverknad på korleis området vil verte oppfatta. Til trass for at linjetraséen går mindre enn 500 meter frå eksisterande linje, vil det grunna høgdeskilnader vera eit inngrep i urørt natur. Kvinnherad kommune stiller seg difor ikkje positiv til dette delforslaget.

Om Alt. 1.3:

Denne traséen går på austsida av Bergsstølsvatnet. Denne traseen vil gi ei passering av området som er mindre ruvande enn Alt. 1.0. Samstundes er det problematisk at det med denne løysinga vil vera ei kraftline på kvar side av vatnet, om ein tek i betraktning traseen for Blåfalli-Gismarvik, som det er gjeven konsesjon til på vestsida av vatnet. Dette vil gje ei betydeleg større totalbelastning på området som heilheit, enn om linjene går på same side av vatnet.

Alt 1.3.1:

Kvinnherad kommune stiller seg positive til at denne traseen vert utgreidd. Denne traseen går i stor grad i gjeldande trasé for dagens line og vil derfor ikkje gå inn i urørt natur. Kvinnherad kommune sitt syn er at alle kraftlinjer bør samlast på same side av Bergsstølsvatnet, slik at det berre er eine sida som blir råka.

Alt. 4.0:

Dette linjeforslaget skil seg frå Alt. 1.0, 1.3 og 1.3.1, like aust for Veslafjellet før den går via Fuglatjørn, Padderinden og Purkehaugen, til Orstegane. Det positive med linjetraseen er at denne vil vera mindre synleg i Åkra. Samstundes går linjetraseen både gjennom delar av Fjellhaugen skisenter som er eit viktig rekreasjons- og friluftsområde, og samtidig via viddeområdet vest for Ingahogg, som er eit ope landskap med veldig lite menneskeleg påverknad. Kvinnherad kommune stiller seg av desse grunnar ikkje positiv til denne linjetraseen.

Alt. 5.0:

Dette linjeforslaget er forkasta av Statnett grunna at traseen går lange strekningar i urørt natur og til dels vil kunne forstyrre villreinområde. Kvinnherad kommune er samstundes merksam på at dette er den traseen som ligg lengst unna bustadområde og såleis vil ha minst påverknad på innbyggjarane i Åkra.

Grunna dei store inngrepa i urørt natur, stiller Kvinnherad kommune seg bak Statnett si vurdering om at dette linjeforslaget ikkje bør utgreiast vidare.

Alt. 1.4.1 og 1.4.2:

Kvinnherad kommune stiller seg bak Statnett si vurdering om at desse linjeforslaga ikkje bør utgreiast vidare.

Blåfalli-Mauranger-Samnanger

Tillegg sjøkabel:

Kvinnherad kommune vil gjere merksam om at område markert i oransje i kartet under er eit område som er klassifisert som «Kulturlandskap av nasjonal interesse». Grøne område er Nasjonalpark og landskapsvernsområde.

Kvinnherad kommune ber derfor at det vert utgreidd følgjande sjøkabelalternativ:

Årsnes-Sandvikjo (A-E)

Årsnes-Dimmelsvik (A-D)

Lindi (Ruglebarm)-Sandvikjo (B-E)

Lindi (Ruglebarm)-Dimmelsvik (B-D)

Skarvo-Sandvikjo (C-E)

Skarvo-Dimmelsvik (C-D)

For alternativ med ilandføring av sjøkabel i Sandvikjo (E), må det vidare utgreiast linjetrasé på vestsida av Omvikdalen.

For alternativ med ilandføring på Skarvo, må det utgreiast linjetrasé frå vestsida av Navarhaug til Skarvo.

Dersom sjøkabelalternativa vert forkasta, bør det utgreiast eit lengre tunnel-/jordkabelalternativ.

Tillegg under Ænes-Lyngstranda-Sunndal-Austrepollen:

Alt.1.1:

Kvinnherad kommune stiller seg undrande til at det ikkje vert gjort utgreiingar for å sjå på alternative traséar i tett tilknyting til eksisterande trasé. Dette er ein trasé som ikkje vil leggje beslag på urørt natur og som i liten grad vil ha negativ påverknad på bustadar. Kvinnherad kommune ber derfor om at det vert utgreidd eit Alt.1.1 som i størst mogleg grad følgjer dagens trasé.

Tillegg sjøkabel i Mauranger:

Kvinnherad kommune støttar ei utgreiing av sjøkabel i Mauranger.

Tillegg sjøkabel mellom Ænes og Jonaneset i Kvam:

Kvinnherad kommune meiner det skal utgreiast sjøkabel mellom Ænes og Jonaneset i Kvam.

Generelt til begge uttaler

Der det skal nyttast luftspenn i og nær tettstadane skal det nyttast master som reduserer arealbeslaget på grunn av faresoner, og som reduserer den visuelle påverknaden.

Generelt bør ein ha ekstra vekt på å unngå utbygging i urørt natur.