Dette er julesongane vi likar best på bygda
Det er forskjell på by og bygd, også når det kjem til kva songar som sikrar julestemninga.
Marknadsanalyseselskapet Respons har på oppdrag frå Tono, selskapet som forvaltar rettane for musikkverk i Norge, spurd eit representativt utval av nordmenn om kva songar som er deira favoritt blant norske julesongar, og andre songar som er omsette og tilpassa norsk, og som er del av det norske julerepertoaret.
I ei pressemelding skriv Tono at undersøkinga viser at «Deilig er Jorden», som òg blir sunge i andre samanhengar enn jula, skårar høgt over heile landet, og i alle aldersgrupper. Nesten halvparten, 45 prosent av oss, nemner denne som ein favoritt.
Annonse
Dernest følgjer «En stjerne skinner i natt» og «Himmel på jord», skriv Tono.
Regionale forskjellar
Nordmenn sin smak innan julesongar blir også styrt av kvar ein kjem frå. På Vestlandet kjem Jakob Sande sin «Det lyser i stille grender» på ein solid andreplass. Det er kanskje ikkje spesielt overraskande at andreplassen for Innlandet er Alf Prøysen si «Julekveldsvisa», eller at det i Nord-Norge er Trygve Hoff sin «Nordnorsk julesalme» som er den mest populære.
«Lokalpatriortismen slår inn når nordmenn skal velja favorittjulesongane sine. Gode tekstforfattarar treff hjarta hos folk, og dersom tekstforfattaren i tillegg kjem frå same område som deg, er sjansen stor for at du får eit ekstra nært forhold til akkurat den julesongen» konkluderer Tono.
Annonse
Bygdefolket vel klassikarane
Ikkje berre er det stor forskjell frå region til region. Det speler også ei rolle om du bur på bygda, eller i byen.
På bygda er det nemleg tendens til at folk føretrekk dei tradisjonelle songane som «Julekveldsvisa» og «Det lyser i stille grender», medan det i storbyane er dei nyare songane, som «En stjerne skinner i natt» og «Home for Christmas», som er vinnarane.
Undersøkinga avdekker òg at 43 prosent av nordmenn, altså 2,4 millioner av oss, plar gå på julekonsertar. Kvinner er desidert ivrigast. Over halvparten (52 prosent) går på julekonsert, medan tilsvarande tal for menn er 34 prosent. Undersøkinga viser òg at desse tala aukar med alderen, for begge kjønn.
