Dette er finalistane i Årets namn

Som i fjor starta kåringa av Årets namn med ein utslagsrunde. 12 knallsterke kandidatar var det å velja blant. Som alltid fekk vi inn svært mange røyster, både på nett, e-post, brev og telefon. Til slutt hadde desse tre fått flest (og vi presenterer dei i tilfeldig rekkefølgje, bestemt av ein «random generator»): Arne og Anna Gjerde, Mauricio Weimar og Per Korsvold.

Det var lenge jamt om tredjeplassen, og det heldt på å bli unødvendig jamt. Vi måtte nemleg forkasta ein god del av nettrøystene fordi folk ikkje hadde lagt inn fullt namn. Vi må igjen understreka at berre fornamn ikkje blir godkjent. Årsaka er at Grenda må ha høve til å kontrollera om kor vidt nokon har røysta fleire gonger, i tilfelle det er lite som skil i teten. Hugs at det er berre høve til å røysta éin einaste gong per person.

Den som kom nærast finaleheatet var Øystein Skaala, etterfølgd av Anika Madsen, Valedamene og Bjørn Heimvik. Vi merka elles forskjell i kven som røysta på kva måte. Til dømes fekk Rita Martens Meyer mange røyster per brev og telefon, mest truleg frå våre eldre lesarar, men ikkje nok på nett til at ho nådde heilt opp i samandraget.

Finalistane

Om finalistane kan ein seia følgjande:

* Arne og Anna Gjerde: Grunneigarane av Fatlandsskogen har utarbeidd turløyper, formidla naturkunnskap og kultur, og utforma svært fine turmål for barnefamiliar, løparar og turgåarar. Dei har saman med Fatland Vel stått for mange kjekke og samlande arrangement i området.

* Mauricio Weimar: Ikkje berre kom Mauricio til finalen i Norske talenter med fabelaktig trommespel og underhaldning; han tok også med seg ni andre flotte representantar for Kvinnherad på finalenummeret. Mauricio er elles ein svært populær musikklærar på Hatlestrand skule, tidlegare også i kulturskulen.

* Per Korsvold: Etter å ha tapt eit veddemål med dottera, sykla Per Korsvold frå Uskedalen til Lyon, medan han samla inn pengar til Kreftforeningen. Heile 330.000 kroner vart resultatet. Han fekk seg også jobb som sjøfly-pilot i den storslegne teaterproduksjonen av «Peer Gynt» i Gålå.

Som alltid oppmodar vi folk til å røysta på den kandidaten dei meiner fortener tittelen mest, uavhengig av geografi, kjennskap og andre tilhøve. Siste frist er torsdag 19. desember klokka 09.00.

Vinnaren blir presentert i Grenda på nyttårsaftan. Vi ynskjer alle kandidatane lukke til!