– Dette er ein sjanse som kjem èin gong i livet

4H er ein landsdekkjande barne- og ungdomsorganisasjon som har fokus på friluftsliv, skapa aktivitetar og det å ha ein arena for barn og unge. Mottoet deira gjev eit godt bilete på kva dei verdset: Læra ved å gjera.

Bratt læringskurve

Ølvestveit er ingen framand for 4H-miljøet, då ho sjølv kjem frå ein familie som i mange år har hatt, og framleis har, stort engasjement for organisasjonen. Sjølv har Ølvestveit vore ein del av 4H-miljøet sidan ho var 10 år gamal.

– Eg har vore med sidan eg var gamal nok til å få bli med, så no er eg på tolvte året. Eg sat i fylkesstyret då fylket vårt søkte om å få ha landsleiren, som blir heldt annakvart år. Berre det at fylket vårt får ha den i det heile er stort, fortel leirsjefen.

Men at det var ho som skulle bli valt til leirsjef hadde ho ikkje sett for seg.

– Me var ein god gjeng i fylkesstyret som hadde mange kveldar der me prøvde å koma på ulike namn og høyra om dei kunne bli og arrangera. Eg tenkte aldri at eg skulle bli leirsjef, men det var fleire som spurde meg og eg tenkte at dette er jo ein sjanse som kjem berre éin gong i livet, seier Ølvestveit.

– Men eg trivst godt med å arrangera, laga struktur, planleggja og styra og ordna, så dette synest eg er skikkeleg kjekt, legg ho til.

Likevel må ho innrømme at det har vore ei bratt læringskurve.

– No har eg jo ikkje gjort noko liknande før, men for å sitera mottoet vårt, læra ved å gjera, så er det noko eg så absolutt har gjort. Slik sett passar det jo fint. Eg er veldig glad for tilliten dei synte meg, understrekar ho.

Verdt det

Ølvestveit kan fortelje at det er 798 påmeldte til årets leir, noko dei seier seg godt nøgde med.

– Det kjekkaste for min del var å sjå at så mange hadde lyst til å bli med og få oppleva det som me har planlagt. Spesielt då me opna for påmelding så var det så mange som sat klare til å melda seg på, og i løpet av det fyrste minuttet var det seksti påmeldte. Då tenkte eg at dette er faktisk verdt å bruka så mykje tid på, fortel Ølvestveit.

Trass i god påmelding, merker ho framleis litt etterverknader etter koronaen.

– Me har vore heldige med påmeldinga, for etter korona har det vore få som har meldt seg på. Det var det me var meste spente på, for det har så mykje å sei for økonomien. Så akkurat det er me godt nøgde med, men me er nok framleis ikkje heilt der oppe som me var før pandemien, seier ho.

– Blant andre organisasjonar som eg har snakka med innan både idrett og friluftsliv, så er det mange som framleis slit. Spesielt det å få tak i folk som kan jobbe dugnad, det verkar nesten som at folk har funne ut kor deileg det er å sleppa. Noko som i grunn er forståeleg, men det å jobba dugnad er jo eigenleg veldig kjekt. Eg håpar i alle fall at me slepp at de blir eit problem hjå oss, avsluttar ho.