– Dette er ei styrt avvikling

I kommunestyret 25. april var to representantar for BKK/Eviny til stades for å fortelja at dei vil flytta ut av lokalet i Dimmelsvik og finna seg ny plassering i Kvinnherad. Men fleire politikarar sa allereie då til Grenda at dei fryktar dette betyr nedbemanning. Blant dei var Gunnar Helleland (INP). Til torsdagens møte sendte han inn spørsmål til ordføraren om saka.

– «Loddet er kasta», seier BKK. Mogleg dette loddet trefte nokon av dei som ivra mest etter å selja Kvinnherad Energi til BKK og ikkje til Haugaland kraft. Ein del av oss andre hadde høyrt om dette loddet, og det viser vel at Høgre-politikk ikkje alltid er den beste, sa han.

Vert ikkje erstatta

Deretter viste Helleland til avtalen som Kvinnherad kommune og BKK signerte i 2019. I den garanterer BKK at ordninga med oppmøtestad i Dimmelsvik og Hatlestrand vil bli vidareført i 15 år.

– Det er berre knappe fem år sidan denne avtalen vart underskriven, så at BKK/Eviny no kjem med planar om flytting innad i Kvinnherad kommune ser vi på som ein start på avvikling i kommunen vår. Med tanke på beredskap og inngåtte avtalar, så er dette noko vi i Kvinnherad INP ikkje kan godta av fleire grunnar, kommenterte han.

Helleland hevda beredskapen allereie er dårlegare enn før BKK overtok, og at talet tilsette er betydeleg redusert.

– Stillingar der tilsette går av med pensjon vert ikkje erstatta, arbeidsplassar forsvinn ut av kommunen, og Kvinnherad sitt igjen som ein tapande part i dette, meinte Gunnar Helleland.

Konkret spurde han korleis ordføraren vil jobba framover opp mot BKK/Eviny for å behalda arbeidsplassane i Dimmelsvik og Hatlestrand i samsvar med avtalen.

Konstruktiv

Ordførar Vegard Bjørnevik (H) var tysdag i førre veke på eigarmøte og generalforsamling i Eviny.

– Eg snakka også med dagleg leiar i BKK. Ho kunne fortelja at dei ikkje er kome skikkeleg i gang med arbeidet som vart orientert om i kommunestyret 25. april, men at dette no skal startast opp. Dei har eit ynske om tett dialog med kommunen, og det blir lagt opp til møte med BKK om dette temaet. Ordførar er oppteken av at avtalen inngått med Kvinnherad kommune skal bli oppfylt, men òg at vi skal vera ein konstruktiv samarbeidspartnar for at dei skal utvikla selskapet sitt vidare, svarte han.

– Mi meining er at dette er ei styrt avvikling av Kvinnherad Energi, og vi sit truleg igjen med ingenting om få år når Eviny og BKK har fått gjort det dei vil, responderte Helleland.