Dette blir den nye reiselivsrådgjevaren

Lillebø fortel at ho alltid har vore glad i å reisa og nyfiken på alt som har med reising å gjera. Då falt valet naturleg på kva studieretning ho skulle velja.

– Allereie som lita var eg nysgjerrig på kvifor folk har lyst til å koma til Norge, eller kvifor det var så mange tyske bilar på vegane. Tematikken har alltid interessert meg, så då blei det både bachelor og mastergrad i det, fortel den nytilsette reiselivsrådgjevaren.

No gler ho seg til å tre inn den nye stillinga, som offisielt tek til 18.mars.

Det var Kvinnheringen som fyrst presenterte tilsetjinga.

God kvalitet

– Det passar jo sjølvsagt både utdanninga mi og erfaringa eg har frå før, det skal også bli kjekt å jobba med dette her heime. Det blir spanande å ta fatt på dei ulike reiselivsspørsmåla og ta stilling til reiselivsproblematikken som Kvinnherad kommune måtte ha. I tillegg så blir det kjekt å jobba litt på tvers mellom Sunnhordland og Hardanger. Her i Kvinnherad har me jo ein fot begge stader, så det trur eg blir spanande, seier ho.

– Me har også mykje som er av ganske god kvalitet her i kommunen, både når det kjem til attraksjonar og turmål. Det er fleire stader som er kjende, i alle fall blant nordmenn flest, som gjerne får folk til å tenkja «Åh, der vil eg reisa». Både Baroniet og Galleri Guddal er døme på slike høgkvalitetsattraksjonar, fortel ho vidare.

Lillebø er oppvaksen på Sunde, men no er heime blitt på Hatlestrand. For augeblinken er det der ho pendlar i frå til ei liknande stilling i Odda.

– Med tanke på at eg bur på Hatlestrand så blir i alle fall reisevegen både kortare og betre. Det å køyra mellom Årsnes og Odda no er lite grann, humpete, fortel ho lattermildt.

Kva ho skal gripa fatt i fyrst når ho trer inn i stillinga seier ho er vanskeleg å svara på.

– Det er fyrst når ein får byrja og har kome inn i ting at ein ser meir kva som er positivt og negativt, styrker og svakheiter. Noko som derimot går att i heile Norge, spesielt i distrikta kanskje, er samarbeid mellom aktørar. Mange sit gjerne litt på kvar si tuva, utan at eg bastant skal sei at det er slik i Kvinnherad. Det blir uansett spanande å sjå korleis det er her, understrekar ho avslutningsvis.