– Det vitnar om kvalitet
Bransjefestivalen 100 Dagar gjekk før påske av stabelen på Stord, der vinnaren kaprar heile åtte festivaljobbar kringom heile vestlandsregionen, deriblant Festidalen.
100 Dagar skal skapa grobotn for erfaringsutveksling, nettverksbygging og samarbeid mellom festivalane på vestlandet, samt vera ein pådrivar for å få fram nye band og artistar frå vestlandsregionen, kjem det fram i ei pressemelding.
Vitnar om kvalitet
Annonse
Kvart år går festivalane saman og gjev eitt band spelejobb på sin festival. Det gjev ein utruleg verdi for artisten som blir valt gjennom både merksemd, ein betalt turné og massevis av erfaring. Tidlegare vinnarar er blant andre Silja Sol, Lekende Lett og Jejune.
I år var det haugesundaren Theodor Lucero som stakk av med sigeren, og som me då kjem til å få sjå blant anna i Uskedalen på Festidalen-scena.
– Theodor Lucero er skapt for scene og rampelys. Me er sikre på at han kjem til å bli ein suksess på årets festivalar. Det er godt gjort å få stemmer frå alle festivalane når me veit kor forskjellig profil og smak dei har. Det vitnar om kvalitet. Dette er ein artist som kjem til å smelta mange nye hjarter i sommar, seier Daidalos Dahle og Jostein Sydnes frå 100 Dagar-styret om årets vinnar.
Artisten sjølv hadde dette å sei etter sigeren:
Annonse
«Dette er ein unik mogelegheit som me grip med begge hendene. Me er utruleg takksame for at festivalane på vestlandet har stemt oss fram, og me gler oss enormt til å reisa rundt og sjå alle dei nydelege festivalane i sommar».
Campusturné
Også Høgskulen på Vestlandet er med på å løfta fram nye artistar, og har dei siste fem åra vore med på bransjetreffet på Stord. I fjor starta dei ei ny satsing der dei sendte artisten Han Herman på campusturné.
«Dette ynskjer dei å gjera igjen i 2024. Bergensbandet The Other End leverte ein nydeleg konsert på 100 Dagar og er plukka ut til å spela konsert på alle HVL sine campus i år, frå Haugesund i sør til Førde i nord».
– Me gler oss til å besøke campusane på Vestlandet, og ser fram til å gi studentane og dei tilsette eit avbrekk frå pareto-prinsipp og didaktiske praksisar! All honnør til HVL og dei som steller dette i stand, og ekstra stor takk til Jostein Sydnes og 100 Dagar. Dei gjer ein viktig jobb og er eit ypparleg utstillingsvindauga for oss og andre artistar i startgropa, sa campusturné-vinnaren The Other End etter sigeren.
