– Det verker som om folkeretten ikkje er gjeldande for alle

I paviljongen i parken på Husnes tente dei lys for dei drepne barna, eit lys per hundre døde barn. Totalen vart om lag 60 lys.

– Over 14.000 menneske er blitt drepne på Gaza sidan oktober. I dag fortel Redd Barna at dei ikkje lenger kan finna oppdaterte tal på kor mange barn som er drepne, fordi det er ingen som kan telja dei, sa Silje Nordtveit Olsen til dei frammøtte.

Det er umogleg å vita kor mange som faktisk er drepne, kor mange som ligg under ruiner. Redd barna og Norsk Folkehjelp reknar at det er rundt 6.000 drepne barn på Gaza.

– Heile familiar er utsletta, og over halvparten av Gaza si befolkning på 2,4 millionar er barn. Ifølge Røde kors dør det eit barn kvart tiande minutt. Derfor har vi valt å tenna lys for desse barna, sa Nordtveit Olsen.

Situasjonen på Gaza har vore anstrengd sidan tidleg 1900-tal, og den første krigen braut ut då staten Israel vart oppretta i 1947. Den 7. oktober i år braut det på ny ut krig.

– Akkurat no er det våpenkvile i fire dagar. Vitne og journalistar fortel at det er ikkje ei sann våpenkvile, for palestinarar vert skotne og angripne. Denne våpenkvila skal gje rom for at israelske gissel og palestinske fangar skal bli utveksla, sa Nordveit Olsen vidare.

300 palestinarar er tatt til fange. 270 av desse er barn og 30 kvinner. Av dei har 235 personar aldri fått ein dom og 22 vart skulda for å kasta stein.

– Vi kjenner namna, andleta, draumane og framtida til dei israelske gislane, men kjenner vi til dei drepne barna sine framtidshåp? Veit vi kven dei 300 palestinske fangane er?, sa Nordtveit Olsen.

Eit sanninga sitt augneblikk

I utgangspunktet har situasjonen vore ein varsla humanitær katastrofe, og det har ikkje blitt betre. Israel har no blokkert Gaza sine forsyningar av vatn, drivstoff, straum, mat og medisinar. Skadde må opererast utan bedøving og premature barn kan ikkje ligga i kuvøse grunna straummangel.

– Det verkar som om folkeretten ikkje er gjeldande for alle. Det er eit aukande tal menneske som tek til orde for folkemord på palestinarar. Verdssamfunnet lar dette skje, og det er berre verdssamfunnet som kan stoppa det. Som medmenneske er det vår plikt å forsøka å stoppa folkemord, sa Nordtveit Olsen, og la til;

– For å sitera FN sin generalsekretær Antonio Guterres; «vi står over eit sanninga sitt augneblikk. Historia vil dømma oss».

Markeringa vart avslutta ved at Silje Nordtveit Olsen leste diktet «Skal du drepe et folk» av Trygve Skaug, før det vart haldt eit minutts stillheit for dei drepne på Gaza.