– Det vart ein suksess

I løpet av nyttårshelga vil Grenda leggja ut fleire av dei mest leste sakene frå året som har gått.

Det står ni bilar der når Grenda møter Ingemar på bubilplassen ein heilt vanleg tysdag kveld.

Bubilparkeringa er utvida sidan Grenda skreiv om dei ved oppstarten, men berre arealmessig. Det nye området er enno utan straum, og det er berre halvannan veke sidan dei fekk klarsignalet frå kommunen.

– Bubilparkeringa blei jo ein suksess, så me såg behovet for eit servicebygg og utviding av straumkapasiteten. Det trengs ein ny trafo der oppe for å få på plass straumen som trengs til det nye bygget og dei nye plassane, forklarar han.

Han fortel at investeringane kostar og at det er mykje jobb.

– Heldigvis har eg hjelp i den yngre garden. Tor Rune, midtarste sonen min, jobbar i Nordsjøen, og har er til god hjelp når han har friperiodar. Og kanskje garden blir meir attraktiv å overta for etterkomarane, vurderer han.

Den midlertidige løysinga for tømming av bubiltoalett og toalett har fungert bra. Det er ein stor tank som vert tømt av SIM ved behov. Og utedoen kjem han av praktisk grunnar til å behalda, for den står i motsett ende av området enn der det nye servicebygget kjem.

Ikkje berre for bubilturistar

Det er ikkje berre området som er utvida, det har òg kome på plass ein leikeplass, 9 hols minigolfbane og ein sjarmerande heimesnikra hest.

– Det er ikkje lenger hest her på garden, så eg måtte finna på noko med denne vogna. Eg har trakka mykje høy i den, smiler Ingemar og peiker på vogna bak på hesten.

Tilbakemeldingane frå bygdefolket på Hatlestrand og Ølve er positive, og fleire har teke turen innom.

– Me ynskjer alle velkommen til å leiga båt, kajakk, eller ta eit slag med minigolf. I førre veke hadde me 8. klasse frå Hatlestrand skule innom. Dei bada, grilla og spela minigolf i strålande sommarvêr. Det er så kjekt at me kan brukast til slike utflukter.

Røyrane ligg idyllisk, men aude til, i skogen mellom Hatlestrand og Ølve, og det er langt til butikk.

– Nokre bubilar har stått her i 5-6 dagar og då treng ein jo gjerne mat. Alt let seg ordna. Det har hendt eg har svippa nokre av gjestene innom Jokeren i Ølve, som ein ekstra service, avsluttar Ingemar med eit smil.