– Det var mykje frosk
I førre veke tok både skuleelevar og barnehageborn ved Åkra oppvekstsenter beina fatt for å gå fjelltur. Det skulle syna seg å bli ein froskefin tur.
Skuleelevane tok bussen innover til Matre, der dei i Ytre Matre gjekk og la i veg for å gå fjellvegen tilbake til Åkra.
– Me fylgde Fatlandsdalen og måtte nok opp i ein 450-500 meters høgde. Oppe på Øvste Fatland møtte me barnehagen som hadde teke ein kortare tur. Me på skulen gjekk vel ein tur på totalt 3,5-4 timar, og det gjekk veldig greitt, fortalde rektor Bjørn Rune Bergane over telefon.
Annonse
– Barnehagen gjekk litt på postvegen som er rydda mellom Matre og Åkra ferjekai, noko som var ein litt lettare tur for desse små, la han til.
Turglad gjeng
På veg over fjellet vart det snart klart at det var eit område med yrande froskeliv.
– Me såg jo litt alle saman, men han eine eleven fann fjorten froskar. Så det var mykje frosk. Det var fleire som haldt i froskane, nokon ville ikkje ta på dei i det heile, men han eine var absolutt den ivrigaste, understreka Bergane.
Annonse
Den turglade gjengen frå Åkra var også svært heldige med vêret.
– Meteorologane melde regn til klokka var 11, og det stemte. Me fekk litt regn den fyrste timen, så skein det opp og me fekk ein veldig fin tur. Ungane likar å vera på tur, og har sjølv spurt etter fleire turar. Det var heller ingen som klaga, alt var berre positivt, fortalde rektor.
– Så når me då er ute og går så ser me etter forskjellige ting, både ulike treslag, lyttar etter gjøken, leikar litt i bekkar og har det mykje kjekt. Sjølvsagt har me også med oss sjokolade til alle saman. Det høyrer med på tur, konkluderte rektor avslutningsvis.
