– Det var det eg brukte rusen til, å stengja alt det vonde ute

Allereie som toåring vart ho teken hand om av barnevernet. Under barnevernet si omsorg opplevde ho også å bli seksuelt misbrukt av nokon i fosterfamilien sin.

Sjølv om ho til slutt hamnar hjå ein familie som tek betre vare på ho, så stoggar dessverre ikkje elendigheita der.

Starten

Heile oppveksten og ungdomstida var prega av mobbing, utanforskap og ei overfallsvaldekt som skuggesette alt anna.

– Eg var mobba heile oppveksten, men etter valdtekta, som skulen tenkte det var lurt å fortelja alle om, vart eg behandla som ein spedalsk. Ingen inviterte meg med på noko og eg enda opp som ein total «outsider», fortel Fosse.

Etter at ho flytta til Bergen for å koma seg vekk frå Bømlo og for å ta fatt på vidaregåande, vart såret etter valdtekta riven opp att då rettssaka starta.

– Eg enda med å stengja alle følelsane mine inne i meg sjølv, eg droppa ut av skulen og byrja å henga i sentrum. Der fann eg for fyrste gong ein stad eg følte meg heime, fortel Fosse.

– Me gjekk rundt og tigga pengar frå folk, ganske kjapt fekk me nok til å kjøpa oss litt hasj før me drog vidare til parken for å røyka. Dette var starten på min ruskarriere, seier ho.

Rusfri

Vidare vart livet prega av endå ei valdtekt, eit fysisk og psykisk valdeleg forhold, og fleire høve der ho måtte gje ungane sine frå seg. Gong på gong fluktar ho inn i rusen for å døyva smertene og dei vonde tankane.

– Det var det eg brukte rusen til, å stengja alt det vonde ute, fortel ho vidare.

Etter 6 sjølvmordsforsøk, 6 avslag på avrusing, og ein skremmande kidnappingsepisode der ho nesten måtte bøta med livet, klarte Charlotte til slutt å bli rusfri og snu om livet sitt og har sidan 2015 vore heilt rusfri.

Ho fortel vidare at ho måtte avrusa seg sjølv utanfor systemet. Mannen ho er gift med i dag, som også er tidlegare narkoman, fekk koma inn på avrusing.

– Kvar dag snakka me saman på telefon, der han då fortel vidare noko av det han lærte gjennom avrusingsbehandlinga, slik at eg kunne prøva å gjera det same her ute, fortel ho med eit lite smil.

I dag er ho ivrig i jobben med å reisa rundt for å driva med førebyggande arbeid, slik at andre unge skal sleppa å slost med rusen slik ho har gjort.

– Etter at eg slutta å rusa meg, har eg teke alle sjansane eg har fått. Eg har utdanna meg og eg har vore med på så utruleg mykje dei siste 6-7 åra. Alt eg har gjort, har eg gjort for å klara å reisa meg igjen, seier Fosse.

– I dag har eg klart å fri meg frå skamma. Eg nektar å skamma meg for at nokon andre har gjort meg vondt, fortel ho stolt.

Til slutt hadde ho noko viktig å sei til alle ungdomane.

– Ver stolte av dykk sjølve, ta eigne val. Dersom nokon tilbyr deg noko, sei «føkk it», det er berre du som kan ta deg sjølv dit du vil, avsluttar ho.