– Det starta med eit pang

Det var både store og små som deltok under «Scenen er din» ved Halsnøy Kulturhus torsdag. Blant deltakarane var Nanna Sofie Fredheim, det unge songtalentet frå Rosendal, som i haust vart oppdaga av musikar Gunn Gravdal Elton, som dernest inviterte det unge songtalentet til å bli med i studio.

– Musikken har eg alltid med meg. No føler eg meg klar til å satsa meir.

Då ho vart spurt om å delta på familiearrangementet i regi av Halsnøy Kulturhus velforeining, var svaret enkelt.

– Eg takka sjølvsagt ja med eingong, eg er jo så glad i Halsnøy. Eg har faktisk budd her eit halvt år for nokon år sidan, så eg kjenner godt til plassen og likar meg her, smiler songaren og legg til:

– Eg var også med å song under «Det store korslaget» for tre år sidan, på team Therese, så eg er blitt kjent med mange kjekke folk her ifrå.

Artisten frå Kvinnherad framførte heile seks songar saman med gitarist Oddgeir Røssland - til stor glede for publikum. Ho framførte nokon av sine eigne songar, mellom anna den nye låta «Ti på to», samt andre kjente låtar. Publikum jubla og song med, og det vart ei stemningsfull avslutning på eit flott familiearrangement.

«Scenen er din» vart ein suksess: Sjå stor biletserie frå Sæbøvikfestivalen

«Ti på to» på Urørt

Fantastisk stemning

Mette Hvidevold hadde berre gode ord å koma med då ho skulle oppsummere korleis dei to første dagane av Sæbøvikfestivalen har gått.

– Desse dagane har gått over all forventning. Onsdag var det fullt på quizen, og teltet var stappfullt med glade folk frå me opna tidleg på kvelden til me stengte. Det var ei fantastisk stemning heile kvelden, fortel ho innimellom organisering og jobbing under «Scenen er din» torsdag.

Familiearrangementet vart også ein suksess.

– Denne dagen starta med eit pang. Me var ikkje klare før folk stod å ville inn i teltet, så det har verkeleg gått slag i slag. Det er fantastisk kjekt å sjå at folk set pris på arrangementet, og ekstra kjekt at så mange flinke ungar og ungdommar ynskjer å opptre, smiler Hvidevold breitt.

Etter «Scenen er din» var det tid for levande musikk ved Husnes Funk Orchestra.