Det skjer på biblioteket

I biblioteket sitt program for vinteren og våren er det mykje spanande for både store og små, i tillegg til dei faste tilboda som er oppe og går att etter nyttår, informerer dei i ei pressemelding.

– Det er mykje spanande som skjer allereie i januar, fortel biblioteksjef Trude Hege Bergesen.

Januar:

17.01 – Plantebonanza med Anders Røyneberg: Ynskjer du å skapa ein liten grøn oase heime, eller treng du berre litt hjelp til korleis få dei grøne plantene dine til å trivast? Då kan du få med deg føredraget til forfattar, influensar og planteekspert Anders Røyneberg og Erik Schjerven.

18.01 – Teater for born, Påskemåne og ønskesol: «Med enkle verkemiddel av høg kvalitet fortel dei ei stor, lita historie, ramma inn av års- og livssyklusane til livet og naturen, på borna sine premissar. Påskemåne, ønskesol er ei leiken og vakker framsyning for born mellom 4-10 år», skriv biblioteket om framsyninga.

22.01 – Spionkrigen med Bård Wormdal: Wormdal er aktuell med boka «Spionkrigen: Det hemmelige spionarbeidet mellom Norge og USA» som tek for seg det løyndomsfulle etterretningssamarbeidet mellom dei to nasjonane som blant anna omfattar avlytting på den russiske grensa og tapping av sivile satelittar.

23.01 – Teater for born, Herr Frosk: Elevar frå kulturskulen kjem til biblioteket for å framføra to små teaterstykke som heiter «Her Frosk fryser» og «Herr Frosk forelsker seg». Stykka eignar seg kanskje spesielt for born i alderen 3-7, i fylgje biblioteket.

25.01 – Jon Fosse-kveld: Dikt av den populære Nobelpris-vinnaren blir tonesett av Klaus Vatne. «Han tilfører Fosse-songane vakre dimensjonar med blå gitarmelankoli så vel som gneistrande soloar», lokkar biblioteket.

26.01 – Elevfri dag: Denne fredagen diskar biblioteket opp med karneval for både små og store. «Det blir skramleboks-verkstad, kostymer og felles karnevalsopptog gjennom sentrum av Husnes», skriv dei om hendinga.

Februar/mars:

01.02 – Føredrag med forfattaren bak boka «Det ordner seg: Sju steg for å overleve småbarnslivet», Julie Valsø. «Julie skriv varmt og humoristisk om korleis vi kan overleve å ha små barn, utan at det skal ta knekken på oss».

26.02-01.03 – Gøy på biblioteket i vinterferien: «Program for heile veka kjem når ferien nærmar seg», lovar biblioteket.

06.03 – Litterær samtale med Lars Amund Vaage og Jan Landro: Vaage er aktuell med boka «Mjølketid», som er ein frittståande oppfylgjar til den Nordisk råd litteraturpris-nominerte boka « Det uferdige huset», medan Landro er tidlegare kulturredaktør i Bergens Tidende.

13.03 – Konsertføredrag med Per Vollestad: «Eit konsertføredrag om kor viktig song og musikk kan vera for folk i krise, om sensuren sitt grep, og om songen som våpen i det oppkuperte Norge».

18.03 – Boklansering: Kristin Schulerud presenterer den nye romanen si «Tynn hinne». «Det vert bokbad, opplesing og musikalske innslag», informerer bibliokteket.

21.03 – Påskekrim-tips med Geir Tangen: «Usikker på kva bøker du skal kaste deg over i påskeferien? Fortvil ikkje, krimforfattar Geir Tangen tek deg med gjennom årets mest spanande krimutgjevingar, og gjev deg sine beste tips frå 2023», skriv biblioteket.

April:

04.03 – Oddgeir Bruaset: Gjensyn – Der ingen skulle tru at nokon kunne bu: «Korleis gjekk det eigentleg med alle menneska som var med i den populære serien? Det får du kanskje svar på når Bruaset kjem til biblioteket», skriv dei i programmet sitt.

23.04 – Menn i uniform med Jan Hellås: «Menn i uniform er ein bokserie for barn, der menn i uniform kjem til biblioteket og les for borna. Denne dagen er vi så heldige å få besøk av bussjåfør Jan Hellås», står det i programmet.

Juni:

01.06 – Sommarles startar.