– Det ser veldig svart ut, men det er eit «men»

Paul Henriksen frå Einang Safety Consult AS, heimehøyrande i Odda, har gjennomført eit lovpålagt planarbeid for Kvinnherad brann og redning. I kommunestyret på torsdag la han fram funna frå ROS-analysen, førebyggjande-analysen, beredskapsanalysen og konsekvensutgreiinga.

Utrykkingstider

Fyrst presenterte han dei viktigaste punkta i Brann- og redningsvesenforskrifta, Utrykkingstidene skal ikkje overstiga 10 minutt, ved brann i:

* Tettbygnad med særleg fare for rask og omfattande spreiing.

* Sjukehus, sjukeheimar og liknande institusjonar som krev assistert rømming.

* Område med konsentrert og omfattande næringsdrift eller liknande.

(Dersom det er gjennomført kompenserande tiltak, kan utrykkingstida for overnnemnde punkt auka til 20 minuttar).

Skal ikkje overstiga 20 minuttar ved brann i tettstader.

Bør ikkje overstiga 30 minuttar ved brann utanfor tettstader.

Ifølgje Henriksen hamnar Ølve alderspensjonat, Husnestunet og Valen sjukehus innanfor 10-minuttarskravet. Rosendalstunet og Halsnøytunet er i 20-minuttars kategorien. Følgjande bygder vert rekna som tettstader med 20-minuttarskrav: Rosendal, Seim, Dimmelsvik, Uskedalen, Herøysund, Husnes, Sunde, Valen, Eidsvik og Sæbøvik.

– Ser vi berre på kravet til tettstader, så kunne Kvinnherad klart seg med to brannstasjonar; ein på Sunde og ein i Rosendalsområdet, sa Henriksen.

Valen sjukehus

Utifrå analysane slo konsulenten fast at brann- og redningstenesta har nokre utfordringar, og føreslo følgjande tiltak:

* Meir opplæring av utrykkingsleiarar og brannkonstablar. Halvparten har ikkje lovpålagt kompetanse i dag. – Det er eit stort etterslep på kompetansen, sa Henriksen.

* Det må tilsetjast fire mannskap ved Husnes brannstasjon, éin på kvart vaktlag, som fungerer som vaktsjåfør på vasstankbil.

* Talet på øvingstimar må opp for alle. Dei med fast vaktordning bør ha 50 timar i året, resten minimum 40 timar.

* Kravet til utrykkingstid til Valen sjukehus er ikkje oppfylt. Tiltak på Valen sjukehus slik at institusjonen vert flytta frå 10-minuttarskravet til 20-minuttar. I dag er utrykkingstida 16 minutt, ifølgje Henriksen. Eventuelt må all behandling flyttast til fullsprinkla bygg.

* Tilsetja fleire utrykkingsleiarar og/eller brannkonstablar ved sju av dei åtte brannstasjonane.

* Få tak i fleire robuste båtar.

Varaldsøy

Fire brannstasjonar i Kvinnherad har blitt oppgraderte dei siste åra: Husnes, Halsnøy, Rosendal og Ølve. Dei fire andre, Uskedalen, Åkra, Fjelberg og Varaldsøy, var Paul Henriksen tydeleg på at ikkje oppfyller HMS-krava. Utifrå forskrifta og risiko er det ikkje krav om at desse stasjonane skal vidareførast. Viss dei skal bestå, er mannskapskravet minst ti personar, derav åtte røykdykkarar.

Men Henriksen tilrådde sterkt at Varaldsøy vert behalde. Då må det byggjast ny stasjon med bil som tek minst 2.000 liter vatn. Varaldsøy har svært mange helseoppdrag, nærare bestemt 26 i dei fem åra frå 2018 til 2022, så Henriksen meiner at stasjonen bør rustast opp i samarbeid med helseetaten.

– Stasjonen på Varaldsøy er ikkje godkjent. Du kan ikkje i Norge i 2024 senda folk til ein garasje og så heim for å dusja etterpå, meldte rådgjevaren, og la til at Arbeidstilsynet kan skriva ut tvangsmulkt til stasjonar som ikkje oppfyller krava.

Trass den lange lista med tiltak, understreka Paul Henriksen at Kvinnherad ligg brukbart an.

– Det ser veldig svart ut, men det er eit «men». Dåke er ikkje verst i klassen. De har reist fire stasjonar sidan 2016, og det er ei bragd i seg sjølv. De har også omfattande opplæring og kursing. Kvinnherad ligg såleis mykje betre an enn mange kommunar, vurderte han.

Skal ein rusta opp dei fire siste stasjonane, viser estimat frå 2022 at det vil kosta om lag 62,5 millionar kroner i alt. Stasjonen på Varaldsøy er kostnadsrekna til 15,2 mill.

Hagatunet

Ordførar Vegard Bjørnevik (H) opna for konkrete spørsmål, medan sjølve debatten om brannstasjonsstrukturen vil koma seinare. Maren Skogseth (V) reagerte på uttalen om Valen sjukehus.

– Sjukehuset er godkjent, og så vidt eg veit skjer all behandling i fullsprinkla bygg, opplyste ho.

Wermund Vetrhus (SV) spurde kvifor ikkje Herøysund bu- og habilitering og Hagatunet i Uskedalen vert rekna som ti-minuttarsobjekt. Paul Henriksen fortalde at ein institusjon til dømes kan vera ei bygning med korridor og rom etter rom. Dei to nemnde bygningane er ikkje slik.

– Det vil gå tid før ein brann spreier seg til neste leilegheit, sa han om anlegget i Herøysund.

Jostein Saghaug (MDG) påpeika at korkje Rosendal eller Husnes «på nokon som helst måte» vil nå fram til desse anlegga på 20 minuttar.

– Det er heilt rett. Men dei vil nå fram til tettstadane, og det er kravet, svarte Henriksen.

Per Svindland (Frp) talte varmt om stasjon på Varaldsøy, grunngjeve med avhengigheita av ferja.

– Viss vi ikkje har stasjon der, så vil heile øya brenna ned, for det er ikkje alltid ferja går, sa han.

– Det bør absolutt vera ein brannstasjon der, støtta Paul Henriksen.

Sak i haust

Siste ord var det ordførar Vegard Bjørnevik som fekk.

– Då har vi fått noko å tenkja på, sa han.

Vikarierande kommunedirektør Gunn Berit Sandnes opplyste at rapporten vil bli nytta som grunnlag for ei saksutgreiing som omhandlar brannstasjonsstrukturen i framtida. Planen er at saka kjem til PTM-utvalet 10. september og kommunestyret 19. september.