Det nye radarparet
Kvinnherad Næringsservice har utvida staben sin med ei mellombels prosjektleiarstilling, ei stilling journalist, fotojournalist og frilansar Vidar Alfarnes har takka ja til.
Etter meir enn 30 år innan journalistikken, der han blant anna har jobba både på Vestlandet og i den store hovudstaden, har Alfarnes valt å bytta beite, i alle fall delvis.
– Det var på høg tid at eg tok fatt på noko nytt. Å livnæra seg som frilanser har blitt vanskelegare og vanskelegare etter at dei store aviskonserna som Amedia og Polaris ikkje har noko interesse for frilansarar lenger. Eigentleg burde eg har søkt meg om etter noko anna for lenge sidan, seier Alfarnes då Grenda pratar med han på telefon.
Annonse
No har kanskje den erfarne journalisten byta beite, men å legga frilanslivet heilt bak seg, har han ikkje planar om.
– No er dette ei 80 prosent stilling, så eg har framleis litt rom for å fortsetja med journalistikken, men sjølvsagt blir det avgrensa kva eg kan ta på meg. No har eg gjort eit vegval som gjer at eg har satsa litt annleis, men eg ynskjer likevel å prøva å ha nokre kundar, fortel Alfarnes.
Betre skodd
Den nye prosjektleiaren trer til i stillinga 07. juni, og kjem til å arbeida saman med næringslos Frode Hetlevik.
Annonse
– Frode har vore heilt åleine om dette, og har hatt mykje å gjera. Eg skal prøva så godt eg kan å vera ei støtte for han. Eg gler meg, og er naturlegvis spent, seier Alfarnes.
Stillinga er førebels berre midlertidig, men målet er, i fylgje Alfarnes, at ein skal få dette til slik at det blir meir varig.
– Eg skal etter beste evne vera ein tilretteleggjar for lokalt næringsliv, finna ut kva dei treng for å for å utvikla seg, eller hjelpa dei med å finna dei rette folka som kan hjelpa dei vidare. Utviklinga galopperer stadig framover, og me ynskjer å gjera bedrifter betre skodd i kvardagen til å møta dei nye utfordringane med dei rette vertøya, fortset han.
Prosjektleiaren meiner sjølv at han kjenner næringslivet i kommunen ganske godt, og håpar at han kan dra nytte at eit stort kontaktnettverk etter alle åra som journalist.
– Dei kjenner meg, og eg kjenner dei, så eg har mykje eg kan dra god nytte av derifrå. Eg håpar at eg kan vera ein god støttespelar for næringslivet, som kan lytta og sjå mogelegheitene. I tillegg kan eg kanskje også vera med å skapa litt meir blest gjennom sosiale media-biten av det, prøva å trekka fleire folk meir fram i lyset, avsluttar Alfarnes.
