– Det må me leggja oss heilt flate på
Venelaget for Halsnøy Kloster har lagt ned ein formidabel innsats for å gjera Kulturløypa ved klosteret tilrettelagt og tilgjengeleg, einaste problemet er at tilnærma alt av arbeid syner seg å vera stikk i strid med den gjeldande skjøtselsplanen for området.
Det var etter eit oppslag i Kvinnheringen om arbeidet Venelaget har gjort at det kom Vestland fylkeskommunen for øyre. Dette kom blant anna fram i eit brev til både Sunnhordland museum og Kvinnherad kommune.
Full stogg
Annonse
I 2009-2010 utarbeidde då Hordaland fylkeskommune ein skjøtselsplan for kulturløypa med arkeologiske kulturminne på Halsnøy. I brevet skriv dei at dei oppfattar det slik at Venelaget for Halsnøy kloster har utført skjøtsel og tilrettelegging på vegne av Sunnhordland Museum.
«Det er utført ei rekke tilretteleggingstiltak i området som ikkje er i tråd med skjøtselsplanen eller lagt fram for Hordaland fylkeskommune eller etter 01.01.2020 Vestland fylkeskommune. Det er mellom anna sett opp ei rekke benker, boder, ei bru med rekkverk, lagt kavl i sti langt meir omfattande og langt utover kartplassering i skjøtselsplanen, stativ og platting til skilt, utarbeidd skilt, og ein gapahuk korav takbjelke framstår å vere innfesta i berget. Kavlgangane er stadvis forankra i grunnen.», står det i brevet.
Vidare gjev dei ordre om full stogg i all skjøtsel og tilrettelegging i kulturløypa fram til dess Vestland fylkeskommune v/seksjon for kulturarv sjølv har fått vurdert kva som no skal skje vidare.
«Vi vil allereie no varsle at Vestland fylkeskommune vil setje krav om fjerning av tilretteleggingstiltak som ikkje er i samsvar med skjøtselsplan og kulturminnelova §§3 og 8. Fjerning av tiltak og tilbakeføring vil måtte overvakast av fylkeskommunen. Ingen tiltak skal utførast eller påbegynnast i samband med kulturløypa før Vestland fylkeskommune har gjeve skriftleg tilbakemelding med avgjerd vedrørande vidare oppfølgjing av skjøtsel og eventuell tilrettelegging av kulturløype Halsnøy.»
Annonse
Legg seg flat
Direktør for Sunnhordland museum Linda Øen seier over telefon onsdag ettermiddag at dei no skal gå i dialog med både venelaget og Vestland fylkeskommune.
– I etterkant av synfaringa som fylkeskommunen gjorde saman med representantar frå både Kvinnherad kommune og Venelaget for Halsnøy kloster, vart då dette brevet sendt til oss. Det som me gjer no er å gå i dialog venelaget og fylkeskommunen for å få litt meir oppklaring på kva me gjer vidare, uttalar Øen.
– Det er ei rekkje uheldige omstende som gjer at me hamna i denne situasjonen. Sunnhordland muesum har dei siste åra ikkje vore heilt bevisste på kva ansvar dei har hatt knytt til kulturløypa, og det må me leggja oss heilt flate på, understrekar ho.
Vidare fortel ho at dei skal ha eit møte med Venelaget for Halsnøy kloster denne veka.
– Eg vil gjerne leggja til at venelaget har gjort ein stor innsats i å tilretteleggja og gjera dette området tilgjengeleg, og det er viktig for meg å påpeika at det ikkje er nokon som har gjort noko i vond meining, seier Øen bestemt.
Annonse
– Alt av arbeid er sjølvsagt stogga, me skal gå i dialog med venelaget og fylkeskommunen og no ynskjer me å finna best mogelege løysingar på ting, avsluttar ho.
