– Det klør litt i fingrane

– Eg har jo framleis tre månadar igjen her i Zenit som er viktige for meg, og eg ynskjer å avslutta her på ein god måte, samtidig så lagar ein jo seg alltid tankar. Eg klør nok litt i fingrane etter å ta tak i ting, samtidig så eg veit meir når eg faktisk byrjar, seier Sjo.

Dei unge

Det er likevel éin ting ho er kjapp med å trekkja fram.

– Noko av det eg har veldig lyst til er å få dei unge vaksne opp og fram, høyra kva dei tenkjer og korleis dei har lyst til at Kvinnherad skal sjå ut om 20 år. Eg trur det er viktig at dei får ein plass der dei kan vera kreative utan at det forpliktar, fortel den nye næringslosen.

– Eg tenkjer då også på dei som er unge-unge, dei som går på ungdomsskulen. Korleis vil dei at fritidstilboda skal sjå ut, kva vil dei skal vera der om 20 år? Det er nok ikkje så enkelt å tenka så langt fram, men det er likevel ein realitet. Eg tenkjer at det er viktig å utfordra dei unge litt, og at dei får vera litt meir framme for å sei kva det er me skal ha å tilby, forklarer ho.

Sjo er klar på at det er dei unge som er framtida, og det er dei ein skal lytta til dersom ein ynskjer at folk skal flytta heim att.

– Det er skilnad på kva ein på 25 ynskjer av tilbod og ein på 60. Det er så mange flotte og flinke unge vaksne som er byrja i arbeidslivet, det er dei som er framtida. Det har blitt gjort mykje godt arbeid, men me er på langt nær ferdige. Det er ein stor jobb, og det er viktig med god samhandling. Kva er det den eine bedrifta har som kan opne dører hjå andre? I staden for å stå éin og éin åleine, understrekar ho.

Våga å dela

– Som ein av få kvinnelege næringslivsleirarar i området her, har du nokre ambisjonar å prøva og rekruttera fleire kvinner inn i næringslivet?

– Akkurat det har eg ikkje tenkt så mykje på faktisk, eg jobbar no berre på, men sjølvsagt er det kjekt at det blir fleire og fleire damer. Det er mange flinke damer i næringslivet som eg håpar kan koma litt meir fram, svarar Sjo.

– Derimot så er det noko anna eg kunne tenkt meg som eg har sakna sjølv, nemleg eit forum for leiarar i Kvinnherad. Ein stad der ein kan samlast og diskutera alt i frå ulike utfordringar i næringslivet frå til dømes innkjøpskompetanse, rekruttering til arbeidsmiljø. Med så mange bedrifter der alle har si eiga erfaring er eg sikker på at det vil vera mulig å få gode råd, fortset ho.

Trass i at den nye næringslosen allereie har fleire ting ho ynskjer å ta tak i er ho klar på at ho på ingen måte har planar om å revolusjonera heile Kvinnherad Næringsservice.

– Når eg byrjar vil eg bygga vidare på den gode jobben som allereie er gjort. Eg håpar at det blir bra og at eg klarer å levera det som medlemane forventar av meg, og helst litt meir. Me er heilt avhengig av eit næringsliv som går bra og som gir grunnlag for rekruttering. Alt heng saman med alt, seier Sjo.

– Eg kjenner litt ærefrykt på at eg må levera og til forventingane til meg, noko som eg sjølvsagt har lyst til å innfri. Samtidig kjenner eg at det å få bruka min kompetanse til nytte for andre jo er heile hensikta, i tillegg til at det er noko som går begge vegar. Næringslivet må finna ein god metode der det kan bli ein synergieffekt, der det er lett å koma med innspel og tilbakemeldingar. Det er viktig at medlemane får noko igjen for å vera med i KNS, avsluttar ho.