– Det kan verka som vi treng ei samtykkelov her i Kommunestyret, for eit «nei» er eit «nei»

– Det å hoppa etter Wirkola er ikkje alltid så lett, men eg skal gjera så godt eg kan.

Leiar i Eldrerådet, Arne Presthus, gjekk på talarstolen etter Ungdomsrådet, og var imponert over presentasjonen deira.

– Ungdomsrådet; har de ein buss de skal rekka?

Ordførar Vegard Bjørnevik (H) ynska å halda dei tre ungdomane igjen ei lita stund for å svara på spørsmål frå salen.

– Vi har to, men vi rekk i alle fall den siste.

Nestleiar Tord S. Hatteberg i Ungdomsrådet svarte at dei hadde litt tid.

– Ta ein dag i lag med kommunen, så vert det fiksa på ein halvtime.

Øyvind Hardeland (Ap) reagerte på alle hindringane for funksjonshemma i Husnes sentrum, og tykte det burde vera råd å ordna kjapt.

– Eg skulle koma med ei gladmelding.

Knut Johannes Helvik (H) prøvde å få ordet etter at strek var sett for Ungdomsrådet si orientering.

– Du skal få koma med den viss den er veldig kort og veldig glad.

Ordførar Bjørnevik let partikollegaen sleppa til på visse vilkår.

– Eg synest det er kjekt at ungdommen får eigarskap til rådhuset.

Vegard Bjørnevik fortalde at han hadde teke Ungdomsrådet med på omvising i kvar krik og krok i rådhuset.

– Så skal eg gjera noko eg ikkje gjer til vanleg; eg skal visa økonomiorienteringa.

Kommunedirektør Leif Ove Mikkelsen måtte steppa inn i økonomisjefen sitt fråvær.

– Det går litt i surr, dette. Kvifor er den open no?

Bjørnevik har framleis ikkje heilt teken på teknologien i det nye, digitale saksbehandlings- og røystesystemet.

– Eg forventar at i framtida skal protokollen innehalda spørsmål og svar.

Per Harald Havnen Löfgren Johansen (Ap) tykkjer ikkje det er godt nok at møtereferata i det siste berre har vist til ei lenke der ein kan finna alle spørsmåla og svara frå kommunestyremøta.

– Du er tidleg ute som vanleg, Johansen!

Ordførar Vegard Bjørnevik opplyste at kommunen jobbar med å endra desse rutinane.

– Eg kan ikkje koma stort nærmare.

Ove Lemicka (Frp) vart oppmoda av varaordførar Thea Vaage til å bøya seg tettare på mikrofonen.

– Det såkalla soft-is-prinsippet på mikronen er tingen.

Knut Johannes Helvik demonstrerte korleis ein skal stå for at lyden skal bli best mogleg.

– Vi har bedt om taletid, og så ser eg at Per Harald og eg berre blir flytta nedover. Eg veit ikkje kva som gjer det, men vi er komne langt ned.

Ove Lemicka var raskt ute med å teikna seg i saka om strategiplanen til Kvinnherad Energi, men oppdaga at andre plutseleg var kome før i køen.

– Det er ordføraren sitt privilegium å setja talarlista. Han ynska at Eigarskapsutvalet skulle få anledning til å snakka om prosess fyrst.

Vegard Bjørnevik tilstod at det var han som hadde endra på talarlista.

– Det kan verka som vi treng ei samtykkelov her i Kommunestyret, for eit «nei» er eit «nei».

Varaordførar Thea Vaage (Ap) er ikkje redd for at Kvinnherad Energi skal byrja å sysla med vindkraft.

– Det er dette krysspresset mellom klima, behov for kraft og naturøydelegging som gjer debatten vanskeleg. Den er vanskeleg, men ikkje umogleg.

Silje Nordtveit Olsen og SV hadde fleire endringsforslag som gjaldt naturvern.

– Det er viktig å høyra kva representantane i Kommunestyret seier, og det er viktig å ikkje prøva å lesa mellom linjene, når det er ingen linjer å lesa mellom. Vi har sagt nei.

Nordtveit Olsen understreka at ingen treng tvila på kva Kommunestyret meiner om vindkraft.

– Eg vil gjera det klinkande klart; Senterpartiet ynskjer ikkje vindmøller i Kvinnherad. Dette står i vårt partiprogram, og vi kjem ikkje til å vika frå dette. Men, industrien i kommunen vår er svært energikrevjande, og behovet for meir energi blir berre større i framtida.

Jarle Andresen (Sp) minna om at det trengs meir kraft både lokalt og nasjonalt

– Det er diverre ikkje berre vindkraft som er trugsmål mot naturen i Kvinnherad.

Jostein Saghaug (MDG) påpeika at det også er andre ting å åtvara mot.

– Det har vore ein lang, men ikkje særleg oppklarande debatt i dag.

Ove Lemicka med hjartesukk etter ein dryg seanse om strategiplanen til Kvinnherad Energi.

– Eg har ikkje mistillit til Kvinnherad Energi. Dei eg har mistillit til, det er sentrale styresmakter, folk som sit inne i Oslo og tenkjer at «no må vi få meir kraft, og vi skal byggja ut fjellheimen».

Ove Lemicka trur det fyrste slaget vil stå i Finnmark, og fryktar raserte fjellryggar fordi staten vil elektrifisera Melkøya.

– Synnøve, eg ser alltid på deg når det er sånne ting.

Ordførar Vegard Bjørnevik ville fyrst nekta Per Harald Havnen Löfgren Johansen (Ap) å halda eit innlegg, og ynska råd frå den tidlegare ordføraren gjennom åtte år.

– Eg tenkjer at du har opna opp for saka på nytt, og det er viktig at alle sider kjem fram i denne debatten. Det er ikkje noko god følelse viss ein igjen får koma med alle sine synspunkt.

Synnøve Solbakken (Ap) forklarte korleis ho ville gjort det.

– Nei, eg får berre ting på øyra.

Bjørnevik forklarte kva som hadde skjedd, og let Johansen få gå på talarstolen likevel.

– Det du legg opp til no, går eigentleg ikkje an! Du kan ikkje stemma for enten kommunedirektøren eller Ove Lemicka viss du ikkje er einig med nokon av dei.

Jostein Saghaug prøvde å berga ordføraren frå rot i røystinga i saka om Kvinnherad Energi.

– No har eg jo gjort… ja, godt poeng.

Vegard Bjørnevik var i gang med å fullstendig avvisa merknaden frå Saghaug, før han midt i setninga skjøna at Saghaug hadde heilt rett. Forsamlinga reagerte med latter.

– Det er denne teknikken som er så fantastisk.

Ein sterkt ironisk ordførar Bjørnevik sleit med å gjennomføra den digitale røystinga i Kvinnherad Energi-saka.

– Guttorm, har du olje på fingrane?

Vegard Bjørnevik hadde endeleg orden på systemet, men no var det Guttorm Røssland (H) som sleit med å få røysta.

– Tilsyn høyrest skummelt ut. Kanskje kan ein få piggane ut av og til?

Oddbjørn Kroka (H) tok ordet i saka om tilsynsstrategien innan byggesak.

– No sit Synnøve Handeland og skriv for harde livet, så eg reknar med ho høyrer etter.

Kroka merka seg at leiaren for byggesaksavdelinga noterte under innlegget hans.

– Eg tok akkurat ein drops, det er litt toskje.

Veronica Thorkildsen Thorsen (Sp) heldt eit innlegg med drops i munnen.

– Ein burde kanskje teke ein skikkeleg språkvask òg, for eg ser ein del skrivefeil.

Varaordførar Thea Vaage (Ap) hadde lese beredskapsplanen grundig.

– Då har vi ein del forslag å røysta over. Det er jo favorittaktiviteten til ordførar.

Vegard Bjørnevik får ein del ekstra utfordringar med å gjennomføra den digitale røystinga når det ligg føre fleire forslag.

– Det vil òg vera siste møtet før ordførar går ut i ein velunt pappapermisjon, så vidt eg skjønar.

Wermund Vetrhus (SV) ynskjer å ha eit kommunestyremøte i midten av januar.