– Det kan jo bli krise

I etterkant av datatrøbbelet førre onsdag, undra Torgils Våge (Sp) kva reserveløysingar kommunen har tilgang til.

Då Kvinnherad Breiband mista nettet førre onsdag, førde det til utfordringar mange stader, mellom anna hjå kommunen. Kvinnherad kommune si reserveløysing er nemleg Telia sitt mobilnett, men tilfeldigvis låg det nede samstundes, grunna oppgradering av sendaren på Skåleberg i Rosendal.

– Vi brukar denne situasjonen for å sjå kva vi kan ta lærdom av, og for at effekten ikkje skal bli så stor som denne gong, informerte IT-sjef Ronny Raudstein i kommunestyret.

Torgils Våge tykte systemet verka sårbart.

– Er det noko reserve oppe og går viss det varer over lengre tid? undra han.

– Det kan jo bli krise, la han til og tenkte mellom anna på brannvern og legevakt.

Raudstein forklarte at i utgangspunktet så er det mobilnettet til Telia som er reserven.

– Vi kunne òg hatt fiber frå Telenor og såleis tre-fire vegar inn, men det er jo eit kostnadsspørsmål. Det hadde blitt frykteleg dyrt, sa han.

Samstundes påpeika IT-sjefen at naudetatane har tilgang til satellitt-telefonar som kan brukast i verste fall.