– Det har vore litt kult å seia at ein har arbeidsveka si i Grenda

Til vanleg går dei i niande klasse på Rosendal ungdomsskule, men denne veka er dei journalistar for Grenda. Ebba Herman Fossli og Kaylah Bermillo Stensletten frå Uskedalen kunne fortelje om ei kjekk og spanande veke så langt.

Litt kult

– Det har på ein måte vore ein liten draum om å kunne jobba i avis, så når det kom ein moglegheit så tenkte eg at eg måtte gripa den. Det var min idé, så fekk eg overtala Kaylah til å bli med også, fortel Ebba med eit lite smil.

– Det har vore litt kult å kunne seia at ein har arbeidsveka si i Grenda, men også å få intervjua dei andre i klassen. Det var ikkje alle som visste det og nok blei litt overraska og lurte på kva i alle dagar me gjer på når me kjem til arbeidsplassen deira, fortset ho.

Kaylah lot seg også fasinere av tanken på å læra meir om ein journalist sin kvardag, men har derimot for augeblinken sett siktet sitt på ei utdanning og jobb som marinbiolog.

– Eg har vakse opp med at feriane våre har vore mykje på båt og segla over alt, i tillegg har eg alltid interessert me for sjødyr og korleis ting fungerer der nede. Eg har likt eit godt mysterium heilt frå eg var lita av, og havet er lite utforska. Det har eg lyst til å gjera, seier ho.

– Samtidig tenkte eg at det ville vore kjekt å få sjå korleis det er å jobba i avis, korleis dei jobbar og planlegg. Det var litt kult å sjå avissidene som heng på veggen, legg ho til og refererer til korleis bladfyken planlegg og lagar avisa på trykkedagar.

Litt stress

Så langt har jentene fått prøva seg på å vera verkelege journalistar gjennom å intervjua folk, ta bilete og ikkje minst skriva saker. I skrivande stund får dei også kjenna på presset som dukkar opp på såkalla trykkedagar og tidsfristar som luskar i det ikkje så fjerne.

– Akkurat no er det litt stress fordi me no har to tekstar me må gjera ferdige, i tillegg har me fått spørsmål om me kan skriva litt om sommarfesten som skulen skal ha denne veka. Så då måtte me dela oss, så eg skriv på noko og Kaylah skriv på noko, forklarer Ebba.

På tampen av intervjuet stod det att eitt siste spørsmål før tidsfristen kalla oss alle tilbake til arbeidet.

– Korleis har det vore å jobba her denne veka?

– Det er jo alltid litt nervar når ein kjem på ein ny plass, men me blei veldig godt teke i mot og det har vore lett å snakka med folk og alle er hyggjelege. Det har kjentest veldig trygt, i tillegg så kjenner me jo Håvard (Sætrevik, journ.merk.) litt frå før, svarte dei begge to.