– Det handlar om å redusera kontaktar

Bruk tilrådingane til regjeringa som reglar, oppmodar kommuneoverlegen.

– Innsatsen me får lagt inn i perioden me no er inne i, er avgjerande for det som skjer vidare. Mykje heimekontor, bruk det om ein kan. Dette hadde kommunen i inngangen til jula også, og det har hjelpt oss, seier ordførar Hans Inge Myrvold og kommunedirektør Ragnhild Bjerkvik.

Ordføraren oppmodar studentar som no har reist tilbake til studiestadane sine om å halda seg der dei no reiser tilbake til.

– Desse komande 14 dagane må me ha for å ha oversikt, og for å sjå at R-talet kjem under kontroll. Me må halda oss heime i eige hus og eigen hage, seier Myrvold.

 

Manar til varsemd

Kommuneoverlegen ber publikum om å følgja tilrådingane frå regjeringa.

– Bruk det som regel. Det handlar enkelt sagt om å redusera talet kontaktar. Ta omsyn når ein er i butikken og handlar, ikkje oppsøk tronge situasjonar, men oppretthald avstand, understreka han.

Han rår frå besøk på institusjonar, og manar til varsemd.

– Eg opplever at kommunen har vore godt førebudd på desse endringane som kjem no, seier ordføraren, og får støtte av kommunedirektøren.

Me har vore rigga for å koma i ny situasjon på kort tid. No håper me å unngå stenging av barnehagar og barneskular, seier Bjerkvik.

Smittetalet i Kvinnherad er framleis lågt.

– Me bur godt her, har nok luft, har vore flinke og hatt flaks. Me har gjort det me har kunna gjera, legg Bjerkvik til.

– Og så har me lokalbutikkar i mest alle bygder. Kvinnherad er ein god kommune å bu i ein slik pandemi, sluttar Myrvold.