– Det går jo ikkje an å driva med minus

– Det var ein veldig trist beskjed å få. Eg fekk veta det nokre dagar før dei hine, og det var tungt. Eg berre grein, køyrde i bilen og grein, fortel ein openhjartug dagleg leiar Magni Gjuvsland då Grenda tok turen innom restauranten for ein prat.

– Me er jo blitt veldig glade i denne staden, så me tykkjer at det er veldig trist. Samtidig så forstår eg det veldig godt. Det går jo ikkje an å driva med minus, som det faktisk har vore i alle år, fortset Gjuvsland.

Støtte

– Korleis var det å måtte gje den beskjeden vidare til dei tilsette?

– Det var heilt forferdeleg! Dei fekk sjokk, og me grein alle saman, seier leiaren.

Det var ikkje berre dei tilsette som fekk sjokk, men også gjestane vart sjokkerte over nyhendet, kan Gjuvsland fortelje.

– Me har fått masse respons frå gjestene. Dei tykkjer det er veldig trist dei også, og me merka spesielt på laurdag at folk støtta oss og at mange fleire kom innom. Så det var jo veldig godt å sjå, seier ho.

– Kva tenkjer du om vegen vidare, klarer du å sjå framover?

– Nei, dit er eg ikkje komen endå. Når eg legg meg om kvelden så tenkjer eg på gjestane og dei tilsette, til slutt tenkjer eg at eg kanskje må tenkja litt på meg sjølv også men det klarer eg ikkje endå. No skal eg fyrst vera her til det er slutt, så får eg prioritera meg sjølv sist, fortel den rørte og engasjerte leiaren.

Inga jul

Gjuvsland er også klar på at ho håpar at nokon andre vil kom inn og bruka lokala etterpå.

– Ting har endra seg veldig etter korona, og alt er blitt så mykje dyrare, men eg føler at både senteret og folket treng ein stad å gå til, ein stad der dei kan setja seg ned og nyta varm og god mat, seier ho.

Ein av dei tilsette som også er på jobb då Grenda er innom, er Laila Kristin Heimstad. Ho seier seg heilt einig med det som Gjuvsland fortel.

– Dette lokalet er jo litt meir gøymd vekk, noko eg ser på som positivt, at ein kan stikka seg litt vekk og slappa av med noko godt å eta, fortel ho.

– Men det er klart det er trist. Endå tristare er det at julefeiringa me byrja med i fjor også forsvinn. I tillegg er det jo blitt ein del tomme lokal her på senteret etter kvart, noko som er veldig synd, avsluttar Heimstad.