– Det er viktig å erkjenna når ein tek feil. Vi i SV har gått på ei skikkeleg blemme

Det vart eit langt møte i kommunestyret, men politikarane var vakne og serverte mange gode galleriglyttar.

– Så skal vi gå vidare i det vanvitige programmet vi har føre oss

Ordførar Vegard Bjørnevik (H) sukka med tanke på den omfattande saklista.

– Velkomen til ein spennande haust. Det kjem til å bli mykje jobb på oss.

Men Bjørnevik er heilt sikker på at politikarane er toppmotiverte.

– Sommaren er jo ei så herleg tid.

Vegard Bjørnevik følte for å sitera Salhusvinskvetten.

– No blei dåke nervøse!

Ordførar Bjørnevik varsla at kommunestyret skal gjera eit nytt forsøk på å ta i bruk digital røysting i løpet av hausten. Fyrste forsøk for eit par år sidan var mislukka.

– Eg har med meg litt på pulten her, for eg skal seia ganske mykje.

Kommunedirektør Leif Ove Mikkelsen tok med seg kaffikoppen bort på talarstolen i sitt fyrste kommunestyremøte etter pappapermisjonen.

– Vi må berre ikkje tru vi har vunne i Lotto sjølv om det går bra.

Øyvind Hardeland (Ap) fryktar kommunen og politikarane blir freista til å bruka pengar ein ikkje har.

– Eg vil sjå den kommunen som har fått til så mange tunnelar og gjort så mange veginvesteringar, og gjort så mykje. … Det er gjerne Bømlo.

Allereie medan han stod på talarstolen, kom Øyvind Hardeland på ein kommune som har fått til meir enn Kvinnherad.

– Øyvind durar i gang med alle vegane sine.

Svein Åge Vangdal (Sp) hadde tydelegvis høyrt Øyvind Hardeland snakka varmt om ulike vegprosjekt før også.

– Eg synest det er dårleg lyd i dag.

Silje Nordtveit Olsen (SV) og fleire andre påpeika at mikrofonen var i det lunefulle hjørna.

– Som ein som reiser til Odda nesten kvar dag, synest eg det er deilig å trilla innover på ein asfalt som ikkje er full av hol.

Wermund Vetrhus (SV) gler seg over vegopprustinga i Mauranger.

– Eg trur eg gir meg før eg blir klubba.

Per Harald Havnen Löfgren Johansen (Ap) reagerte sterkt på at fylket ikkje vil ut med tala for Kvinnheradpakken.

– Eg vil skryta over regjeringa.

Ove Lemicka (Frp) sjokkerte salen.

– Ordførar, du er høgare enn meg.

Kontrollutvalsleiar Hans Inge Myrvold (Sp) oppdaga at høgda på talarstolen måtte justerast.

– Der Synnøve Solbakken seier vi ikkje har kome lenger på 6-7 år, synest andre det går for fort.

Ove Lemicka konstaterte at det er sprikande meiningar om framdrifta til helsehuset.

– Det er mange som no har fått ein mail frå Kvinnherad kommune. Den er mest sannsynleg eit virus, så for all del ikkje trykk på den. Det var kommunedirektøren som berga meg.

Vegard Bjørnevik heldt på å gå i fella.

– Eg skal prøva å vera kort, for eg byrjar å bli svolten.

Saka om helsehuset drygde ut og lunsjen vart forseinka, noko Helge Tangerås (H) sleit med.

– Denne gongen er eg glad eg er langt nede på talarlista, for det er mange som har sagt mykje fornuftig.

Jostein Saghaug (MDG) var samd med mange av innlegga om helsehuset.

– Det er viktig å erkjenna når ein tek feil. Vi i SV har gått på ei skikkeleg blemme.

Hildegunn Hanstvedt Tofte (SV) angra på at SV tidlegare hadde røysta mot å flytta Halsnøy helsesenter til Helsehuset på Husnes. No hadde dei fått vita at dei tilsette sjølve ynskjer ei slik flytting.

– Eg stiller meg undrande til kostnaden på parkeringskjellaren, 1,5 millionar kroner per plass synest eg høyrest veldig høgt ut. Andre prosjekt eg har sett på opererer med 850.000 per plass.

Wermund Vetrhus var skeptisk til kommunen sitt estimat.

– Hadde eg vore tilsett i Kvinnherad kommune, så hadde eg undra meg over kva politikarane held på med.

Per Harald Havnen Löfgren Johansen tykkjer det har vore mykje att og fram, ansvarsfråskriving og såing av tvil om helsehuset.

– Eg håpar på mange replikkar slik at dette dreg ut i tid. Eg trur ikkje nokon har lyst på lunsj enno.

Helsehuset var framleis ikkje ferdig-debattert, så Thea Vaage (Ap) serverte litt ironi.

– Eg er svolten, men eg må ta denne replikken likevel.

Helge Tangerås prioriterte politikk føre mat.

– På vegner av alle parti ber eg om gruppemøte. Og så ber eg om at vi får litt tid, for det er så mange innspel å vurdera.

Drøftingane mellom gruppeleiarane i lunsjpausen hadde ikkje ført saka om helsehuset i mål. Per Harald Havnen Löfgren Johansen måtte difor be om meir tid.

– Då opnar vi saka. Nei, det er ingen frå Sp her. Klart dei må få vera med.

Ordførar Bjørnevik oppdaga plutseleg at Senterpartiet framleis sat i gruppemøte.

– Eg skal henta dei, eg.

Knut Johannes Helvik (H) meldte seg som hentemann.

– Helviken er lett på foten.

Bjørnevik takka for innsatsen.

– Han tok idrettsmerke i går for 49. gong. Han skal leggja opp til neste år når han har 50.

Per Harald Havnen Löfgren Johansen kunne stadfesta at Helviken verkeleg er sprek.

– Eg heiar på Thea, eg.

Ove Lemicka var verkeleg begeistra for Arbeidarpartiet denne dagen. No var det Thea Vaage som fekk ros.

– Vi burde reist til Oslo heile kommunestyret og banka på.

Lemicka meiner vi bør stå på krava om kompensasjon for meir kraftutbygging.

– Kvinnherad kommune har dårleg erfaring med fellesmøte i Oslo. Sist braut det ut ein pandemi.

Vegard Bjørnevik minna om at formannskapet reiste til hovudstaden dagen for koronaen stengde landet.

– Då kan vi ynska representanten Hatteberg tilbake.

Vegard Bjørnevik ynska brannkonstabel Stine Hatteberg tilbake i salen etter ei utrykking.

– Ein god barndom varer livet ut.

Inger-Elin Nesheim (KrF) støtta auka grunnbemanning i dei kommunale barnehagane.

– Der eg bur er det ikkje plass til større bilar, og dei kan ikkje snu.

Gunnar Helleland (INP) åtvara mot at bossbilane blir for store for vegane vi har.

– Ordføraren hadde nok klart å snu. Men alle er ikkje som han.

Tidlegare lastebilsjåfør Vegard Bjørnevik har tru på eigne ferdigheiter.

– Vi set ikkje fyr på raketten, sjølv om vi seier ja til eit oppstartmøte. Her er det snakk om å få ballen til å rulla, med god ballkontroll og endå betre lagspel. Saman er vi krutet, utan sjølvantenning. Og då har eg brukt opp alle metaforane.

Elise Vangdal (Sp) var i det inspirerte hjørna under debatten om Rosendal Turisthotell.

– Eg ser eg sit på raketten, og kanskje eg ramlar av, men det får så vera.

Øyvind Hardeland følte seg treft av førre innlegg.

– Eg er garantert kortare enn begge dei føregåande talarane.

Tove Lill Lakselv (Frp) kasta seg med i rekka av talarar som varsla korte innlegg.

– No er vi kome til den tida i møta der det er om å gjera å vera kortast.

Jostein Saghaug har registrert at innlegga gjerne plar verta kortare utover i møta.

– Eg har aldri vore nokon fotballmann. Eg stod vel bak og spente den vegen foten peika.

Øyvind Hardeland mimra om fotballkarrieren sin.