– Det er nødvendig å minnast

I samband med at det i dag er ti år sidan terroren råka regjeringskvartalet og Utøya, har Vestland fylkeskommune lagt ut eit intervju med fylkesordførar Jon Askeland (Sp).

– Som samfunn må vi læra oss å leve med sorga, men det er aldri enkelt. Det er som å riva av eit plaster, og minna og kjenslene kjem tett på. Men vi må minnast for ikkje å gløyma, seier fylkesordføraren.

Vondaste kapittelet

22. juli deltek han på minnegudsteneste i Bergen Domkirke og på minnekonserten på Verftet same kveld. Det vert elles ei rekkje arrangement over heile landet for å markera at det er ti år sidan dei verste terrorhandlingane i Norge etter andre verdskrig. Til saman vart 77 menneske drepne i angrepa, og mange vart hardt skada.

– Dette er det vondaste kapittelet i den nyare historia vår, og det er nødvendig å minnast både dei vi mista, men også dei verdiane som var under angrep, seier Jon Askeland.

Han er særleg oppteken av at politikarar og andre må ha med seg det som skjedde i valkampen føre stortingsvalet i september.

– Det er ekstra viktig å minnast og markera verdiane som bitt oss saman når vi no går inn i ein valkamp, der vi skal drøfta kven vi er som samfunn, og kvar vi skal. Då er det heilt grunnleggjande at alle skal vere trygga i utøvinga av samfunnsengasjementet sitt, slår han fast.

Vestland hardt råka

Arbeidarpartiet og AUF-ungdomsleiren på Utøya var eitt av måla for terroristen. 69 menneske blei drepne på øya, fleire av dei var ungdomspolitikarar frå Vestland. Anne Gine Hestetun er gruppeleiar for Arbeidarpartiet i fylkestinget:

– Det er ingen tvil om at tragedien på Utøya har prega Arbeiderpartiet, sjølv om vi har lært oss å leva med det. Vestland vart hardt råka. Eg er full av respekt for alle våre ungdommar som står fjellstøtt i arbeidet for demokrati og fellesskap, seier ho.

Hestetun legg til at vi aldri må gløyma.

– Eg er opptatt av formidling. Nye generasjonar må kjenna historia og sårbarheita, og forstå at vi må verna om verdiane våre, seier Hestetun, som også har vitja Utøya i ettertid av terrorhandlinga.

– Det var sterkt å oppleva historia fortalt av ungdommar som hadde opplevd dei forferdelege timane 22. juli 2011. Sterkt å oppleva at det store engasjementet var tydlegare enn nokon gong.

I august skal det avdukast ein plakett på Bergen Katedralskole til minne om dei i Vestland fylke som vart drepne i terrorangrepet på Utøya.